«Дагестан» РИА-лул залдануву хьунни Дагъусттаннал Росгвардиялул Вневедомственный къаралданул управлениялул хъунаманал хъиривчу, полициялул полковник Оьмар НурбахIандовлул пресс-конференция. Ва хас дурну дия вневедомственный къаралданул юбилейран. Октябрь зурул 29-нний ва къуллугъ сакин хьуну 70 шин бартлагантIиссар.
КутIану цала къуллугъраягу бувсун, Оьмар НурбахIандовлул журналистътурал суаллахьхьун жавабру дуллунни.

– Вневедомственный къаралданул агьамми буржру цукунсса бур?
– ХIакьинусса кьини жул къуллугърал агьамми буржру бур национал гвардиялул аьралитурал буруччин багьлагьисса хъуннасса агьамшиву дусса объектру мюхчан баву, жяматийсса низам дуруччаву ва агьалинал мюхчаншиву дузал даву. Мукунма Аьра­сатнал субъектирдай лавайсса къуллугъирттайсса инсантал мюхчан баву.
– 2016 шинал апрель зуруя байбивхьуну, вневедомственный къаралданул къуллугъ Росгвардиялул структуралувун бувтунни. МуницIун бавхIуну зул къуллугъраву ци дахханашивуртту хьур?
– 70 шинал лажиндарай жул къуллугъравуксса дахханашивуртту чувчIав къархьухьунссар. Къуллугърал агьамми буржирдая тIурча, ми мудангу гайва гай бур. ХьхьичIва кунма, цIанагу жу буручлай буру личIи-личIисса объектру, агьалинал къатри.
– ХIакьинусса кьини цими объект бур зул биялдарай?
– Техникалийну, къарал бацIан бувну, личIи-личIисса журалий жу буручлай буру республикалий 3500-нния ливчусса объектру ва квартирарду. Шиная шинайн ми чIяву хъанай бур. Жул къуллугърал ляличIисса къулагъасрайн лавсун буссар топливно-энергетический комплексрал объектру ва кIулшивуртту дулаврил идарартту.
– Ссан дацIлацIиссар къатри, квартирарду охранно-пожарная сигнализациялул дузал баву?
– Агьаммур пультрайн бу­ккайсса, баян байсса охранно-пожарная сигнализациялийну объект буруччаврих ссятрай 11.88 къуруш дацIайссар. Мува журалий квартирарду мюхчан баву зуруй 263,60 къурушран, цивппа заллусса къатри – 593,14 къурушран бацIлацIиссар. Леххаву рутайсса кнопкалийну квартирарду ва цивппа заллусса къатри мюхчан баву зуруй 263,60 къурушран дацIайссар.
– ЦIанасса чIумал чIярусса дур хIукуматрал дакъасса къаралданул организациярду (ЧОО), миннаяр ялтту буккан ци чаран лякъару?
– ЧОО-далгу, жулгу къуллугърал буржру цакуццуйсса бунугу, ми жул конкурентътал бакъар.
Цалчин, АьФ-лул ХIукуматрал 2017-ку шинал 15-мур майрай бувксса хIукмулий ккаккан бувну буссар так жул подразделениярттал мюхчан байсса объектру.
Квартирарду мюхчан бавривугу миннал къуллугъ жухун къабахчилачиссар. Агьалинан хIукуматралмур къаралдания къулайшиву дуссар. Масала, ца квартира мюхчан баву зуруй 1000 къурушран дацIлацIиссар, миннува заллухъруннал дуллалиссар так 263 къуруш, гайми – хIукуматрал. Цинярдагу жул къаралданул ляркъусса арцу Федерал бюджетравун наниссар. Жулмур къуллугърая агьалинан къулайшиву мунивугу дур, жул организация цакуну лакьин ягу банкрот хьун къабюхъайссар. Ялагу, агана жу буручлачисса объектрая жуй аьйну ци-дунугу дакъа хьурча, икьралданийн бувну, залуннан хьусса зарал лахъайссар.
– Жяматийсса низам дуруччавриву ва тахсиркаршивурттащалсса талатавриву зул подразделениярттал бияла цуксса буссар?
– Жу гьуртту шайссару республикалул Виваллил иширттал министерствалул дуллалисса профилактикалул мероприятиярттаву. Мукунма, жува буручлачисса объектру бусса кIанттурдай хьусса тахсиркаршивуртту ашкара давриву. Нанисса шинал 9 зурул дянив жул зузалтрал полициялул органнайн уллуну ур административ нарушенияртту дур­сса 364 инсан.
– Ссах бурувгун, цукун кьамул байссар зучIан даврийн?
– Цинявппагу ихтиярду дуруччай органнавун кьамул буллалиминнаясса тIалавшиннарду жучIа зун ччиминнаягу дуссар. Буссар къуллугъру хъиннува личIлулну, мюрш бивкIун ххал бан аьркинсса. Масала, оьрмулун нигьачIаву дусса шартIирдай зун багьайсса группардавун (группа задержания) буцайссар цIуллу-сагъшиврул чулуха ва моральнайну хъиннува цIакьсса, хьхьичIун ливчусса. Хъуннасса къулагъас дуссар кIулшивурттал даражалух, цанчирча миннан захIматсса техникалущал зун аьркинссар.
Язи увгьусса кандидат цаппара зурдардий жучIа стажировкалий икIайссар.
– Къуллугърал даража хъиннува гьаз бан ци чаран ляхълай буру?
– Къуллугърал даража гьаз бан, хьхьичIунмай бан аьркинмур гьарзат жучIа дур – техника, арцу ва азарахъул инсантурал вихшала.