Аргъираву дур ссут – яла буллугъмур, бакIлахъиялул аваданмур чIун. КIулсса куццуй, залуннан хъуснияр хъуслин заллу аьркинни. Ххяххан дурмур, аьрщарая дучIан дурмур ядаврилгу агьамшиву къачIирир. Ва иширавугу цаппарасса маслихIатру къабахчинссар тIиссару.

Ккижру кутIану кьукьияра
Дукьлан хьхьичI ахънилссаннул ккижру кутIану кьукьияра, 2,5 см. дусса кутIасса магъру кьадиртун. Ванияр кутIану кьукьирча ахънилсса, кьакьлай, ччяни гиж датIлай дачинтIиссар.

Ахънилсса­ннуйсса аьрщи зизин дувара
Дукьлан хьхьичI ахънилссаннуйсса аьрщи мугъаятну, ахънилссаннуй ххарцив къахьунну, щеткалух зизин дувара.
Холодильникравун дукьан хьхьичI най дуна ишла дуван къананисса ахънилссагу, ахъул­ссагу шюршуну къахъинссар, шюршумур, ялттусса къат лирну, ччяни зия хъанай дачайссар.

Архну – нахIуну
Помидор, нувщи ва перец кувнничIату кувгу, ахънил­ссаннучIату ва ахъул­сса­нну­чIатугу архну битан аьркинссар. Вайннувату буклакиссар этилен газ – чIаравмур ччяни диян дувайсса, зия хъанахъи дайсса. Помидорданул чIарав хъахъи къурул ва чIикIунтIалул тIин зия хьуну лякъинтIиссар, перецрал чIаравсса нувщирив ччяни ххяхлай байбишинтIиссар.

Помидор
Томатру ядурну хъинссар къатлул температуралий, кухнилуву чIамуй. Холодильникраву 10 градусраяр яларай­сса температуралий ядуллалисса помидордал тIин-тIааьн зия шайссар. Мунияту помидорду, чара бакъасса иш ба­къахьурча, холодильникравун мадукьару. Агарда помидорду нюжмардийсса, гьантрай­сса ядуван аьркинну духьурча, холодильникрал лувра-лувсса чIамуй ядувара. Яла, дукралувун ишла дуллан хьхьичI, помидорданул тIин-тIааьн зана баншиврул, холодильникрава ду­ккан дурну суткалийсса къатлуву дитара.

Перец
Перец, ци журалул бунугу, холодильникраву ябуван аьркинссар, цайми ахънилссаннуяр, ахъулссаннуяр личIину, архну.

Накьлил уртту
Гъаран ва махъсса цаймигу накьлил уртту холодильникраву, тIутIал кацIру кунма, щинащалсса стакандалуву дирхьуну ядувайссар.