Дуккаврил шин къуртал хъанай, май зурул 21-нний республикалул чIявуми школардай бивщунни Махъва-махъсса гюнгутIи. МуницIун бавхIуну, ЦIуссалакрал райондалул школарттай хьунни дуклаки оьрчIру школалия личIи хъанахъисса, ххариссагу, пашманссагу асарду хIала бувхсса байранну.
Гьашину Махъва-махъсса гюнгутIи бивщунни ЦIуссалакрал райондалул 11-ми классру къуртал бувсса 192 оьрчIан ва 9-ми классру къуртал бувсса 512 оьрчIан.
Школа къуртал буллалиминнахь барчаллагьрал махъру увкунни кIулшивуртту дулаврил идарарттал каялувчитурал, райондалул шяраваллал администрациярттал бакIчитурал, директортурал, учительтурал ва оьрчIал нитти-буттал.
Новостройрайсса ЦIуссалакрал гимназиялул выпускниктурахь ххуллухъин учин увкIун ия ДР-лул Халкьуннал Мажлисрал депутат Артур Исрапилов.
– Ххирасса оьрчIрув, на зун чIа тIий ура гьарицагу ишираву тIайлабацIу. Школалия лавгун махъсса оьрму зула дакIурдин ччикунсса хьуннав. Ва бигьа бакъасса заманнай хьунадакьинтIиссар зул оьрмулуву захIматшивуртту, амма на мукIруну ура зу миннул хьхьичI ник къарищунтIишиврий. ТачIав хъамамабитару зува язи бувгьусса ххуллул цIакьсса гьану ЦIуссалакрал гимназиялий бивзшиву. Чаннасса ва илкинсса хьуннав зул ххуллу, – увкунни Артур Исрапиловлул.
Ванал мукунма барчаллагь увкунни кIулшивуртту дулаврил ххуллий хъунмасса захIмат буллалисса педагогтурахь. Выпускниктурал нитти-буттахьгу увкунни экзаменну дулунцIакул, хъювусул къабуклай, зула оьрчIал дакI данмур буллай, чIарав бацIияра куну.
ТIутIал кацIругу лавсун, выпускниктал учительтурачIан гъан хьусса чIумал, якьама буклай бия учительтал ва нину-ппу.
Ванияр тихуннай вай экзаменнайн хIадур хъанахъисса, гьалак буклакисса чIун хъанай дур.
ЧIа учинну цинявппагу выпускниктуран язи бувгьусса ххуллийх кьянкьану бачинсса кьудрат.