Уттигъанну ттула хъув бувгьусса нувщул чIапIая колорадуллал зиянчитал-гъангъаратIив батIин най унува, бакIрайн агьуна цулуцисса жагьил, чIаххувчу. Ссалам-аьлайкгу бувну, ганал бувсуна ва дуцлацисса лухччи шярава шагьрулийнай лавгсса цама чIаххувчунал лухччи душиву.
Ва иш багьана хьуна макьала чичингу. Ттун кIулссия шагьрулийнай лавгсса инсаннал Лаккуй даву диркIшиву. Дуссия ганал щарссанилгу шийра даву. Амма цаппара шиннардил хьхьичI га ларгуна шагьрулийннай. Вана утти ласналгу, жул Вихьуллал зумуну учин: «Щарссанил хъирив къар дархIунни». Бунияла, ва таксса иш бухьурчагу, укунсса ца-ца «кIунтIлия хъанай дур гъарал».
Цамур кьинигу на увкссияв сайрданий Ттуккул- БурхIайх хьуну Тарссала-БакIучIан ияннин. Яла ттун ччан бивкIуна чIаравсса Оьмал-БакIуйнгу гьаз хьун. КIийн гьаз хьуну, лагма ургайхту, тIабиаьтрал суратрал ччиманал дакI гьаваллавунгума леххан данссия. Бувая Щуну-Зунттуха баргъ буклангу. ЧувчIав инсаннал рухIгу янилун дагьлай дакъая. Бия анжагъ тиву-шиву, алжаннавун багьсса кунма, чIалачIисса так-туксса гъаттара. Оьмал-БакIуя чIалай дия Вихьуллал, Ссухъиящиял, ЦIийшиял, Къяннал, ЧIяйннал, Ваччиял шяраваллу. Виардараллил-БакIуйсса телевышкалуха чIалай дия Читтурдалмур шяравалугу. Арулва зунттул арулла сурат, арулла ххаришиву. Бюхттулсса зунттурдал дянивсса Ватан. Илкинсса арнил билаятрайсса гъурбат. Цумурдивав вайннувату язи дугьан аьркинмур? Суалданухьхьун жаваб дуллай, нарив къумасса зунттал Ватан язи дугьав.
Махъунай нанисса чIумал, ттун ххуллул чIарав ялагу ца аьламат бакIрайн дагьуна. Культура тIун бикIай Европанаву хъуннассар тIий. Бюхъай. Амма ттул янилусса ишираллив ва иширайх хха буклай бия. Ттух буруглай бия ххуллул чIарав хъирттайх тIутIал яргсса шалка лавхсса ца исвагьисса оьл.
Ма винна сурат – жалин-оьл! Ялагу, гара кьини, шавай увкIун махъ, ттун ттулла щарсса ляркъуна къатрал хьхьичIсса ларзулу щядиркIун, кIюрххилсса марцIсса гьавалий. Ганил ттухь: «Ина чун лавгссияв кIюрххила?» – тIисса суал булайхту: «На лухччинийх сайрданий уккан лавгссияв учайхту, ганил : «Хъинъяхха, жунна цамур цичIав дириллай дакъарча, гьававагу бириллалисса», – куна. «Инания, ттул аьзизмур, шаэр хьуну дура. Ми шаэрнал зумату кунмасса махъру бур», – увкуссия. Ганилгу оьрус мазрай: «Муж и жена одна сатана», – куна.
Макьадитларду жулла буттахъал Ватан! Ватангу, зувагу хьияра ца сатана!»
