ТIабиаьтрал низамрайн бувну, цалнияр цал гьава кIири хъанай бур, жунмагу захIмат хъанай бур кIиришиву духIан. Цува инсан рязисса чIунгурив чанни – кIинттул дяркъу дур, гъинттул – кIиришиву дур тIий, кIинттул гъи ччай дур, гъинттулгу кIи ччива тIий бур. ТIабиаьтращал ччалан къашайссар, кьатIув ци гьавалул тагьар дунугу, му бигьану духIан жущава шаймур булларча бакъа.

* * * Лахлахияра дюхлулсса, чурххацIун къаларчIсса, гьарта-гьар­за­сса лаххия, натуралнайсса янналия дурсса.

* * * БакIрай за дакъа, бургъиясса мюхчаншиврунсса яру къабивхьуну кьатIув мабуккару.

* * * Гьантлун диялссаксса щин хIачIлачIияра. Чан дувара кофе ва градусру думи хIачIияртту.

* * * КIиришиву духIан захIматри, хаснура кондиционер дакъасса ч1умал. Шаппа, даврий, чIун-чIумуй лажин-ка дяркъусса щинай дюхлул дуллалира. Щинай вичIал уттуллугу (мочки ушей) атил булларча, зун хIисав хьунтIиссар зува дюхлул хъанахъишиву.

* * * Дяхтта, баргъ кIири був­сса чIумал, жалюзи дакъами чIавахьулттал пюрундалийн лачIун бувара фольга, цилгу чани ва кIиришиву махъуннай дайщун дуллантIисса.

* * * ЗучIара гьава хъатан бувай­сса хасъсса затру (увлажнителлу) дакъахьурча, кIирисса гъинтнил гьантрай гьава хъатан буваншиврул, зува бусса къатлуву (кабинетраву) щинащалсса зат дишара.

* * * Мукунна, гьава хъавтун би­кIаншиврул, ишла дувара пульверизатор. Щинал дурцIусса пульверизатор цаппаравасса хIаллай холодильникраву дишияра. Дя­къингу диртун, чIун-чIумуй мунива гьаваллавун щин пурх дуллалира. Щинавун суврарал чIапIив ягу нисвартилул ккири бичирча, гьава, хъатрулуцIун, тIааьнсса кьункьалгу буцIинтIиссар.

* * * Зува бусса кIанайсса гьава цIу буккан булувара. Амма чIавахьулу анжагъ ца чулухасса бухьурча, къатта кьатIатусса кIиришиврул буцIинтIиссар. Къаттагу кIири къавхьуну, гьава цIу букканшиврул личIи-личIисса чулухасса чIавахьулттив тIитIин аьркин­ссар, сквозняк бувну.

* * * Лархъсса вентиляторданул хьхьичI морозильникравасса щинащалсса шушри дирхьуну бюхъантIиссар къатта анаварну дюхлул хьун буван.

* * * КIири лавгсса чурх бякъин буван ишла дувара, къадяркъуссача, гъилисса щинал душ. Дяркъуми щинал чурх ялунмагу кIири лаган бувайссар, чурххава кIиришиву дуккан къадиртун.

Хъиривгу буссар