Ванил ппу ур ЧукIнатусса, нину Ахттатусса.

Дунияллул зуманивгу лак лякъин бюхъайшиву кIулнугу, щин дакIнийн багьанссия Дунияллул халкьуннал дянивсса цIанихсса Шанхайрал университетраву жагьилсса лаккудуш дарс дихьлай бухьун­ссар куну. Цуппагу ингилис мазрай. Ванил дишай­ссар академический рисунок, модная иллюстрация, янналул дизайн ва маркетинграл дарсру. ЧIивисса оьрмулий (ванин 30 шин хьун дурар) Эльвира Башанаевал бивтсса ххуллул, дурцирив давурттал хIисав-сан дуллалийни, кIива оьр­му бувтсса хханссар.
ДакIнийн бутан, Эльвирая жу хьхьичIвагу чивчуссия («Илчи» №24.2021 ш.), ва Франциянаву хъинну машгьурсса EngrаinaGes тIисса инновациялул проектирдал ва бизнес-планнал конкурсрай ххув хьу­сса чIумал.

Вай гьантрай Эльвира бувкIунни Дагъусттаннайн. Жу хьунабавкьуру ХIабиб НурмахIаммадовлул «Папаха» тIисса кафелуву. Ва кафе язи бугьаврил багьананугу хьуну бия Эльвирахь дазул кьатIувсса дустурал ХIабиб НурмахIаммадовлул кафелул суратру рища учаву.
Эльвира бур дакI хъинсса, пиш-пиш тIийнмасса душ. Ванищал­сса ихтилатгу тIааьнсса, аьчухсса хьунни, хьунабакьавугу дакIний личIансса хьунни.

---

– Эльвирай, буси жул бу­ккултрахьгу вила оьр­мулия, нитти-буттая. Цукун багьра ина дазул кьатIув?
– На бувну бура 1993-ку шинал Каспийск шагьрулий. Ттул ппу Аьбдул ЧукIнатуссар, нину Маида Ахттиял шяравассар. Ттул ссу Сабина мазурдиха зузисса бур. Ва лингвист-таржумачири, Подмосковьелий ялапар хъанай буссар.

Оьрмулул 5 шин хьусса чIумал­ва ттун кIулссия нава художник-модельер хьунтIишиву. Мунийн цукунчIавсса щак бакъассия. ЧIунархIал душру ва пишакар хьун ччива, тамур пиша язи бугьавияв тIисса чIумал, на кьянкьану учайссия: «На художник-модельер хьунтIиссара, навагу Англиянаву ялапар хъанантIиссара», – куну. На чIивисса чIумал, ттун Дагъус­ттаннайсса гьава къабакьлай, жул кулпат Подмосковьелийн бивзун бур. Тийх, Черноголовка шагьрулий лавгссара на школалийнгу, 9 класс къуртал бувну махъ бувхссара Калининнул цIанийсса художествалул училищалувун (цIанасса Строгановское училище). Мукьра шинава вагу ЯтIул дипломрай къуртал бувну, бувхссара промышленный дизайнрал Строганнул академиялувун. Мукьра шинай шивугу ххуйну дуклай буссияв. Шамилчинмур курсирай дук­лакисса чIумал, ттул портфолиогу ккавккун, ттун ххуйну ингилис маз кIулшивугу чIалай, на бувцунна ца семестрданийсса Шанхайрал университетравун. Семестр къуртал шайхту, ттухь тиккува дарс дихьлахьу тIун бивкIуна.
Вана укун, дуклайгу бунува, на Шанхайрал университетраву ингилис мазрай дарсру дихьлан бивкIссара. Таний ттун 23 шин дия. Шанхайрал университетравусса дуккаву хъинну ххирассар, 14 азарва доллар шинай булун аьркинссар. На уква (бюджетрай) ккалай буссияв. Ялунгу, преподавательнал харжгу ласлай. Цаппара ттул студентътал оьрмулул ттуяр хъуниссагума бия. ДачIи кьини на ттула дарсирдай бикIайссияв, гамур дачIи кьини ттула одногруппниктурахь дарсру дишин лагайссияв.
Ттул дуккаврийгу, даврийгу дакI даркьусса университетрал каялувчитуран ччан бивкIуна на фэшн-дизайнрал кафедралул хъунмурну бавцIуну. Муния махъ, дазул кьатIув магистратура бувккуну бакъахьурча, жуща ина жучIава цIакь бан къахьун­ссара тIий, магистратура буккин маслихIат бувна.
На рязи хьура. Лондоннай ччай бурив ягу Парижлив ччай бурив куну, цIувххусса чIумал, на Париж язи бугьав. Язи дугьав люкс-маркетинграл отделение. На цачIава зуншиврул тиккусса дуккаврихсса багьагу Китайнал буллуссар.
ХIасил, на къуртал бав магистратура шама яла хьхьичIунми студентътурал сияхIраву. Ти­кку дуклай бия щалагу дунияллия­сса студентътал. Миннаву яла жагьилмур на бияв. Магистратуралувун бувхсса чIумал, ттун 25 шин дия. Ттущал дуклай бия 35-40 шинал оьрмулувуссагу.
ТIайланма учинна, Франциянаву Аьрасатнаву куннасса кIулшивуртту къадулайва институтирттаву.
2020-ку шинал, циняв коронавирусрал шаппа щябивтсса чIумал, на Парижлив ттула компания тIитIав. Ванияр кIира шинал хьхьичI тIиртIусса компания Москавливгу дуссар.

– Ми, таний инара конкурсрай ккаккан дурсса куннасса, личIи-личIину лаххан шайсса янналул брендрурив?
– Мигу, цаймигу. Ттул, ца «трансформирующая одежда» дакъассагу, цаймигу стандартрал, классикалул линияртту дуссар. Буссар хьхьунил гьухъри (вечерние), каних бурувххусса (ручная работа), инсаннал тIалавшиндарай ва дуциндарай байсса. Ва яла ххирамур линияр. Жура-журану лаххан шайсса янна – му цамур линияр. Ми яннагу цайминнуяр ххира­ссар, цанчирча ми ттисин хъинну захIматссар. ХIисав да, кIира рангирай ва кIира формалий лаххан шайсса пиджак. ХIасил, «четыре в одном». Трансформирующаясса янналул къулайшиву мугу дур, аьрххилий увкнан чIярусса затру ласун къабагьай. ЧIявуну цайми билаятирттайн лехлахисса ттун ттунна мукунсса янна хъинну дучIи лякъай, багаж куклу дан. Щалагу дунияллий ва бренд цайминначIа дакъассар. Ттун пикри хьунни, ттула бюхъу-гьунар ишла бувну, цайминначIа да­къамур дан. Шиккува кIицI лаган, фэшн-индустриялул дунияллий 2-мур кIану бугьлай бур жула гьава, тIабиаьт зия давриву. Ласунну джинсилул янна. Вай итадакьин чIярусса хIачIай щин ишла дайссар. Миннул ранг щилащийнигу, чIярусса щин зия дайссар химикатирттал. ХIасил, гьарица производствалул зия дуллай дур тIабиаьт. Вай гьарзат хIисавравун ларсун, на пикри бав, хъунна­сса масштабрал бренд итадакьлакьисса чIумал, тIабиаьтран бю­хъайссаксса чансса зарал хьун­сса чаран лякъин.

– Ина итадакьлакьисса янна ва аксессуарду чув ласун бюхъайссар?
– ЦIанасса чIумал ми дахлай дуссар инстаграмрайсса ELVIENSE ттул сайтрайхчIин, мукунна Валберис ва профессионал сайтирдайхчIин.
Жура-журану лаххайми да­къасса, гьанулул линия дирхьуну ду­ссар Валберисрай. Ми дахлай дуссар щалагу Аьрасатнаву, Къазахъисттаннай, Беларусьнаву. ЦIана тIайла дуклан бивкIссар Европанавун ва Американавунгу. Аьрасатнаву муштаритурачIан укра диян дайссар. Пикри бур офлайн ттучан тIитIинсса.

– Дуссарив вил цайми билаятирттащал хIала-гьурттусса проектру?
– Ларгсса шинал EngrаinaGes конкурсрай ххув хьуну, кIул хьунна на чIявуминнан. Та чIумал Франциянал инвестортурал маслихIат дунни ттун цала билаятрай зузи дансса проект. Франциянал цала хIукуматрай компания тIитIлай бухьурча, ххуйсса кумаг байссар проект зузи дан. На рязи хьура. Мукунма уттигъанну ттуйн був­ккунни Дубайрая, Индонезиянава. Пикри буллай бура ттула цIанасса брендран ишла дан хъинавав инвестициярду ягу цIусса тIитIин хъинавав тIий.

– Цуми билаятирттайн бивра ина? Цумур ля­личIину ххуй бивзри, дакI­­ний ливчIри?
– На бивссара Египетнавун, Израиллайн, Палестиннайн, Аьраб­нал Эмиратирттайн, Монголиянавун, Франциянавун, Италиянавун, Австриянавун, Испаннавун, Бельгиянавун, Вьетнамнавун, Тайландрайн, Индонезиянавун, Китайнаву бура 23 шин хьуния шийнмай. ЦIана хъунмурчIин Турциянаву, Антальялий, бикIара. Ттул нину-ппу, тихун бивзун, тийх ялапар хъанай бур. Бивссара Аьра­сатнал чIяву­сса шагьрурдайнгу. ЛяличIинува ххуй бизай Франция. Ттун ва билаятрай гьар цимурца ххуй дизай, лахъсса багьри личIаннин. Мугу бувчIлачIисса зат бур. Франция чIявуминнан ххуй бизлазисса билаят бур. Шиккува бусан, Парижлив х1акьинугу ккаккан бю­хъайссар студент ч1умал на ч1юлу бувсса Крафтовое пиво ттучан. Монголиянаву, Китайнал дазуй­сса Шифенг шагьрулий буссияв. Тикку хьхьичIазаманнул цивилизациялул раскопкартту ххуй дирзуна. Ца-кIива махъ учин ччива Китайная. ЦIанасса чIумал Китай супер державалун ккаллину бур. Ва кунма анаварсса бущилий хъунма хьуну, гьаз хьуну нанисса билаят цамур бакъар.
Гьарица дачIи шинай леххара на Шанхайливн. ДачIи шинал дянив тикку щаллусса шагьру бувну бикIай. Китай цIана гуж-цIакь ххисса, арцу дусса хIукумат дур. ХIакьинусса кьини машгьур­сса люксрал брендру Китайнал, Кореянал ва Японнал халкьуннай дарцIуну дур. Китайнал жучIарату ресурсру ларсун, масала тIама, тайннуя дурмур жунна ацIлий ххирану даххай. Къащи хъанан дикIай, цанни, ресурсругу дунура, жура къадуллалисса миннуя агьалинан аьркинмур тIий.

– Цуми билаятирттал мазру кIулли?
– Яла ххуйну кIулли ингилис маз, ххуйну кIулли паланг маз. Китай мазрай ттунма аьркинмур бусан, бувчIин бан шай. Маша буллалийни кьюкьин дан, багьлуй бацIан хIарачат бара, цанчирча Китайнаву, чил билаятрал инсан ккаккайхту, багьри ацIийла лахъ бантIиссар.
Шиккува бусан, Китайнаву ттун оьрмулуву дарсну хьун­сса чIявусса затру лавхьхьунни. На бувкIра ва билаятрайн 20 шинава ливчусса оьрмулуву, нач-намусъсса, сикъавсусса, лагьсса чIуний гъалгъа тIисса, лажин ятIул дичлачисса, Дагъусттаннал тарбия ларсъсса душну. Ттун нач хъанай дикIайва затрал багьа цIуххин, кьюкьин дува учин. Шанна шинава на тиха хъинну баххана хьуну, учин бучIир, оьрму бутан лавхьхьуну, бувкIра. Китай бур дунияллий яла чIявусса халкь бумур билаят. Тикку жула Дагъус­ттаннал тарбиялия пайда бакъая, сивсуну, кьянкьану къуццу тIий, вила хIарачат инава буллай ххуллу ласлан багьлай бия. Аьрасатнаву училище къуртал бувну, диплом буручлачисса чIумал, ттула мазрай гъалгъа тIий бунугу, чIу зурзу тIий бия. На аьдатну бакъаяв чIявусса инсантал бусса кIанттай ихтилат буллай. Китайнаву гьарица шанна нюжмардий ингилис мазрай презентация дайссар профессортал хIаласса чIявусса инсантурал хьхьичI. Тикку магьир хьунни ттул ораторнал гьунаргу. Ттуя рязисса деканнал тавакъю бунни Аьрасатнаву цала институтравун буххан­сса гьунар бусса оьрчIру-душру лякъи куну. ЦIана на Аьрасатнавусса Шанхайрал университетрал вакил хъанахъиссара. ТтуйхчIин бухлахиссар аьрасатлувтал ва институтравун. На кьамул дара минначIа ингилис мазрал ва творчестволул портфолиолул экзаменну. Ду­ккаврихсса багьа шикку ххира­ссар. На хIарачат бара ми бюджетрайн бичин.

– Дагъусттаннаясса студентъталгу бурив Шанхайрал университетраву?
– Цалсса бакъар.

– ХIакьинусса политикалул тагьар асар хъанай дурив вин чил билаятирттай, аьрасатлув хIисаврай?
– Политикалул ареналий хъанахъимур паччахIлугърал бакIчитурал даражалийсса ишру бур. Укунмасса инсантурал жула чулухунмай сси бушиву ттун хIисав къавхьунни. Китайнаву, масала, аьрасатлувтал ххирар. Уссу, ссу тIий гъалгъа тIун бикIай.
Уттигъанну на Франциянава бувкIра. Барз ва бачIи бував тийх. Оьрус мазрай гъалгъа тIун нач хъанай къабивкIра. Ттул чулухунай зунххи уруглагиссагу цучIав акъая. ТIайлассар, ххирасса бутикирттаву Аьрасатнал паспорт бухьурча, цичIав итадакьлай ба­къая. Даххултгу багъишла битияра, ялату мукунсса тIалавшинна дурча тIий, бувчIин буван хIарачатрай бия. Миккугу жула инсантурал чаран лякъай. Франциянавусса дустурайхчин ласай цанна аьркинмур.

– Чил билаятирттай вин цалагу дагъусттанлувтал хьунабавкьурив?
– Парижлив чIявусса аьрасатлувтал бур. Оьруснал диаспорагума дур. На тайннал ххарину кьамул бунна. Дагъусттанлувталгу, чачангу бур тIун бикIай, ттун хьунакъабавкьунни. Парижлия бачин хьхьичIсса гьантрай на хьунабавкьура Карл Маркс­лул правнучкащал Фредерик Маркслущал. Ва Парижлив бувну бур. Ххуйну кIулну бия ­оьрус маз. Цила чIумал ванил хъунмасса захIмат бувну бур Дагъус­ттаннаясса лу чичин материаллу ратIлай. Хъунма хIал къавхьуну буккан аьркинссар ва лу. Ва чIявусса билаятирттайн, мукунма Ккавкказнавун бивсса, чIявуну Дагъусттаннайгу бивкIсса бур. Дагъусттаннал халкьунная, культуралия кIул буллай бивкIун бур. Лу цал паланг мазрай буккан тIий бур, яла оьрус мазрай. На да­гъусттанлувтурал цIания ванихь му даврихлу дакIнийхтуну барчаллагь учав.

– Эльвирай, ина махъва-махъ Дагъусттаннай та буссияв? Ци дахханашивуртту хьуну чIалай бур вин Дагъусттан? Бив­ссарав ина буттал, ниттил шяравун?
– Утти-цIана бучIаннин, Да­гъусттаннай на буссияв 2019-ку шинал. ХIисав хьунни «лавкьу­сса» душру чIяву хьуну бушиву. Шагьру хьхьичIванияр марцIну бур, инфраструктура ххуй хьуну дур. Ххуй хьуну дур таксирдал сеть. Ци чулийгу, жула халкь аьчух­сса, хъинсса бур. ТIааьн бивзунни укунсса ишгу. Ца ттучандалий жун хъама бивтун бия дука-хIачIанмур лавсъсса кьуцуру. Гьантри лавгун махъ гава ттучандалийн бувх­сса, гайннан жу бувчIуну, жунмагума хъамабитала хьусса кьуцуру буллунни, зуща ливчIун бия тIий. Ххуй къадирзунни хьхьирил чапалшиву. Турциянаву, Анталья шагьрулий, хьхьири хъинну марцIну буссар. Властьрал органну, та цала «мусил чIан» душиву бувчIлай, хъинну марцIшиврул ялув бавцIуну буссар. Жуннагу аьркинни жула ресурсру, караматсса тIабиаьт дуруччинсса чаран ляхълан. Ниттил ва буттал шяравун на къабивссара. Та-бунугу биянсса пикри бур. Хъинну ччай бур Шалбуздагъ зунттуйн лахъан. ОьрчIний цал лавхъсса асарду тачIав хъамакъабитай.

– ЦIанасса чIумал ина ссаха зий бура? Ттиния тийннайсса планну ци дур?
– МахIачкъалалив ттула бренд ELVIENSE цIанилусса ттучан тIитIлай бура.
Дан ччимур чIярусса дур, ка хъирив лаллай дакъар. Художник хIисаврай хьхьичIунмай хьун ччай бура. Ччай бур цал Аьрасатнал Художниктурал союзравун, яла Американал ва Францияналмунивун буххан. ЦIана ттул клиентътал бур Аьрасатнаву, Турциянаву. ЧIун-чIумуй Франциянавун левххун инсантурал заказру кьамул дувара.
Ччай бур Американаву ва Франциянавугу дахху-ласу нирхиравун рутан. ЦIанасса чIумал ттул кьайлул лишан (товарный знак) – Эльвира Башанаева, ххюва билаятрал – Франциянал, Китайнал, Американал, Турциянал, Аьрасатнал сияхIрай дуссар.
Мугьлат бакъа Американаву дахлан аьркинну бур, цанчирча патент лавсун шанна шинава циняв категориярдай вила товарный знак ишла дуллай ба­къахьурча, вища му зеххин бю­хъайссар. Регистрация – му хъинну ххирасса процессри. Мунияту, муницIа къахьун хIарачат бан багьлай бур.

– Оьрмулуву яла агьаммурну ци ккалли дара ина?
– Ца-кIива мукъуйну учин захIматри. Ци дулларчагу, инсантуран чани буллай, ххаришивуртту, ххуйшивуртту, хъиншивуртту дуллай, оьрму бутавур ттул мурад. Ччива, Занналгу кабавкьуну, ттула кашигу ишла дурну, дуниял ххуй чулийннай даххана дуллан. Ччинал ччимур дувача, ттун укунгу оьккину бакъар къатIий, гьарица инсаннал цала лагма-ялтту, цахъи дунугу, ххуйшивуртту, хъиншивуртту дулларча, жуламур оьрмугу, гихунмайсса никирал оьрмугу ххуй чулинмай баххана хьунтIиссар.
Ттун ччива хъуннасса компания зузи дан, лавайсса даражалийн лахъан. Му чIумал ттул каши ххишаласса дикIанссия, чIявусса инсантуран ка-кумаг бангу хьун­ссия.
ХIасил, ттун ччива Заннал буллусса неъматру инсантурачIан биян буллалисса илчину бикIан.
– Буси вичIанна дуркIсса дахханасса заказирттая.
– Ца инсаннан мунал параметрардай ва тIалавшиндарай дур­сса заказ гьарицагу дахханассаннун ккалли дан бучIиссар.
Дизайнертурал ци-дунугу да­хханасса ляхъан дувай, заказчиктал ми ттисин, дуруххан шайсса инсаннах луглан бикIай щалагу дунияллий. Мукун чIявусса заказчиктал ттуйн буккай.
Уттигъанну, кактусрал бурчуя ттисинсса, дуруххансса инсан къаляхълай, ттуйн бувккунни Аьрасатнавасса клиентка. Бурчу Мексиканаву, Эльвира Антальялий лявкъунни ванин. «Вища бю­хъанссарив?» – тIий бур.
– Бигьанна, – учав.
Мяйжаннугу, латексрал янна дуруххан шайсса инсаннан цамур янналул заказ къазахIматссар.
На нукIувагу кIицI лагав, латекс ттисин ва дуруххан яла захIматмур яннар. Ванин заргалнал куннасса ка аьркинссар. Му канилух дурксса ттун кактусрал бурчу цири? (хъян бикIай). Мукунма уттигъанну ттуйн бувккунни Индиянава­сса заказчиктал. Миннан аьркинну бия хъатIул гьухъри. Индиянаву хъатIи ххюва гьантлий бикIайссар. Ххюрагу кьини личIи-личIисса гьухъри аьркинссар. Миннул дизайн на дантIиссар.
Ялагу, чурххал къалип стандартный бакъасса инсантуран янна дуруххангу къабигьассар. Мукунмигу чIявуну ттуйн бу­ккайссар.
– ЦIанасса чIумал ина чув ялапар хъанай бура?
– ХъунмурчIин Парижлив. Яла Аьрасатнаву ва Антальялий. Уттигъанну Флоренциянаву бу­ссияв, Понцано шагьрулий, барз ва бачIиннуй.
Июнь зуруй пандемиялул чIумал лавкьуну бивкIсса Шанхайгу тIивтIунни. ТIайлассар, дазул кьатIату уттигу итабакьлай ба­къар. На уттигу онлайн режимрай бура дарс дихьлай. Ттул студентътал бачIи Китайнаву, бачIи Кореянаву, бачIигу Европанаву бур.
Китайнаву ссят 10-нний кка­ккан дурсса дарс дишин ттун кIюрххицIунмай, ссят 5-нний, бизан багьайссар чIумул тапаватшиврийн бувну.
– Вила хиял?
– Ттул хиял бур Щалагу дунияллий машгьурсса брендрал янна итадакьлан. Мунил магьиршиву ва дизайн лахьхьин дансса художествалул школа ва институт тIитIинсса.
Ттун ччива, жула Шанхайрал университетрал деканнал кунма, Щалагу дунияллий ва чулухунмай гьунар бусса инсантал ляхълай, дуккин буллан. Миннал цIаний харж дурмур яла ттуршлий ма­хъуннай зана дикIантIиссар.
– Ци учин ччива, ихтилат къуртал буллай?
– Барчаллагь учин ччива ттула нитти-буттахь нигьа къабувсун, вихшала дирхьуну на, жагьил­сса душ, тархъаншиву дуллуну дунияллийх итабавкьусса. ТачIав ттун ххуллу къалавкьусса. Мукун къабивкIссания, на ва даражалийн къабиянтIиссияв. Хъунма­сса барчаллагь учин ччива ттула преподаватель, машгьурсса, гьунар ххисса художник Егор Харитоновлухь. ЧIивисса харжирах къаурувгун ва жущал, зузи кьини къуртал хьуну махъгу, ссят ацIра хьуннин зий икIайва, цала даву ххирасса уну. Ванал ттун чIярусса кIулшивуртту дуллуссар. Утти­гъанну, ттуйн ув­ккун, ттул давурттал выставка дунни. ЛяличIину ттулсса цукунни цIувххукун, ина кунна портрет­ру дишайсса цама акъа­ссар, – увкунни. Ттун тIааьнну бия вайксса шинну ларгун махъ кьянкьа­сса тIалавшинна дусса преподавательная укунсса махъру баян. Ца ттул сурат – холстрай маслалух дирхьусса «Каршуву­сса гьивчущалсса душ», ванал дирхьуну дия цала выставкалул буклетрал мужаллатрай.
– Барчаллагь, Эльвирай. Вил дакIнийсса гьар цимурца бартлаганнав.
КутIасса ихтилат хьунни ттул Эльвирал ниттищал Маидащалгу. Ванил бувсунни цуппа ла­ккучунащал чув, цукун кIул хьу­ссарив, цала гихунмайсса оьрмулия ва багьу-бизулия. КIул хьуну бур вагу, Аьбдулгу Болгариянаву. Маида зий бивкIун бур Каспийс­калий общепитрай. Тиккусса комсомол организациялул секретарь бивкIун бур. Мичча путевка дуллуну, лавгун бур Болгариянавун. Дагъусттаннаясса группалуву Аьбдулгу ивкIун ур.

Тай шиннардий дазул кьатIув наними бавтIун инструктаж дай­ссия. Микку ккавккун бур Аьбдуллун Маида. Яла махъ бувсун бур, ва душ жула группалувун багьссания тIий ивкIшиву. Болгариянаву 10 гьанттагу бувну, зана хьусса чIумал, Аьбдуллул увкуну бур на виха лавхьхьусса ля­къинна ттунма буцин куну. Туну, бувчIлай ухьунссия лакку душ буцин аьркиншиву.
– Къалявкъухьунссия ттуха лавхьхьусса, арулла шинава ванал на лявкъунна. Эльвирал творчествалул тунну ванаяссар. Аьбдул ия кару мусилсса. Ванал ду­къавайсса даву дакъассия – дуру­ххаврия тIайла хьуну, къатри даврийн бияннин. Дишайссар ххаллилну суратру.
ЦIубутIуй ва «Дагдизель» заводрай зий икIайссия. Яла, кооперативрду буллан бикIайхту, МахIачкъалалив кооперативраву бурчуя затру дурухлан ивкIуна. Яла жу Каспийскалий жула цех тIитIарду. Жу буруххайссия кьяпри, плащру, курткарду, дубленкарду, юбкарду, гьухъри. Цирдагу хъинну усттарну. МахIачкъалаливсса элиталул дагьан къаритайссия жу дурурххумур. Та чIумал Китайнава къадучIайва жучIанна ла­ххия, Турциянава дукIлакIимургу гьарзат ца журалул дия. Инсантуран эксклюзив ччай дия. Миннан ччимур Аьбдуллулгу дайва. Магьирсса бурчул усттар хIисаврай кIулссия ва цинявннан. Буттая бивунни Эльвирангу ва гьунар. Учин бучIиссар, ва ххярка тIисса чIумуя цехравур хъунма хьусса. Бурчул касакру кьацIливун ласлай, ххаллу зурчIай тIий дикIайссия.

АьбдуллучIан сянат ла­хьхьин дуклаки душру бучIайссия. Ванал минная астал байва. Турциянаву жу дурурххумур ккарккувкун, зучIанма зун буцара тIун бикIайва. Миннал дурухлу ххал дурну, Аьбдуллул хъярч байва, на къабуцинтIиссия зу куну. Тайннал хIарачат чIярусса дуруххансса бия. Аьбдуллуннив качество ччан дикIайва. Мунияту жучIа дурур­ххумур тIалавнугу, сийлийгу дия. 25 шин ларгун махъгу, хIакьинугу ххал шай жун жучIара дурурхху­сса затру инсантурай. Цаннан ца кка­ккан дуллан бикIару.
ЦIана жу кIиягу пенсиялий буру. Жущава шайсса кумаг буллай буру Эльвирал дуллалимунин, – тIий бур Маида.

Ихтилат бувссар
Андриана Аьбдуллаевал