Федерациялул Советрал председатель Валентина Матвиенкол ва Дагъусттаннал БакIчи Сергей Меликовлул республикалул социал-экономикалул масъалартту ххал бигьлагьисса совещание дунни.

---

Кьурбан-байрандалул гьантри бухьувкун, агьалигу барча бувну, Матвиенкол кIицI лавгунни, географиялул тагьар ва миллатру чIявушиву хIисавравун лавсун, республика уникальныйсса душиву. Бувсунни МахIачкъалаллал аэропорт цIу буккан буллалисса давурттал кIилчинмур ятIапрай цинна дакI даркьушиву ва дуллалицирив давуртту бартдигьин кумаг бувантIишиву. Аьра­сатнал Виричу НурмахIаммад ХIажимахIаммадовлул цIа­ний­­сса школалийн бияврил хIакъираву ванил увкунни: «Мяйжаннугу, гьунар був­сса Виричу лайкь хьунни школалунгу, кIичIираваллингу цIа дизан. Дагъусттаннахь барчаллагь тIий бура укун бюхттулсса патриотътурахлу. ХIакьинусса кьинигу вирттал спецоперациялуву гьуртту хъанай бур». Федерациялул Советрал Спикернал гьаз бунни коррупциялулмур суалгу. «Коррупциялун ххуллу кьукьирчанни республикалийн инвесторталгу кIункIу хьунтIисса, бизнесрал ишгу бачинтIисса. Промышленностьрал цIусса предприятияртту, экономика сантирай ва лябуккулий гьаз хъанай ччай бухьурча, коррупция духлаган дувара», – маслихIат бунни ванил.

Туризмалийн бувккун мас­лихIат бунни ххуйсса патирду буллан, инфраструктура къулай дуллан, шяраваллил ва дуки-хIачIиялул туризм машгьур дуллан. «Дагъусттаннай туристътал ялу-ялун чIяву хъанай бур, бушиврия маэшатрангу хайр буссар. Туризм экономикалул ца саламатсса ххяччари, цIусса гостиницарду булланшиврул инвестициярду кIункIу дуллан аьркинни, бигьалаглан ччиминнан къулай­сса шартIру дузал дуллан». Ванил кIицI лавгунни республикалий оьрчIансса садикру биял къа­хъанай бушиву. ОьрчIру буллалаву хIисавравун лавсун, Дагъусттан махъми регионнан ккаккиялунсса душиву ва нитти-буттахъан кIулну бикIан аьркиншиву цалва оьрчIан садикрайгу, школалийгу кIану бикIантIишиву.
Да­гъусттаннал БакIчинал бувсунни, захIматшивурттахгу къабурувгун, экономикалул тагьар къулай дувансса чараннах луглай бушиву, масалдаран, гьашину 126 социал объект зузи бувантIишиву, ва Дагъусттаннал тарихраву ккаккиялун­сса иш бушиву.

Да­гъусттаннал ХIукуматрал хъунама Аьбдулмуслим Аьбдулмуслимовлул, агропромышленный комплексрал даврия балжину буслай, кIицI лавгунни республика, шяраваллил хозяйствалул продукциялул производство ва ризкьи хIисавравун лавсун, билаятрай хьхьичI ххуттай душиву. Бувсунни ларгсса шинал 238 тонна лухIитIутIул ва 119 тонна ппиринжрал бакIлахъиялун дартIшиву.

Вице-премьер Ризван Гъа­зимахIаммадовлул бувсунни МахIачкъалаллал Машлул портрал ва аэропортрал хьхьи­чIун­шивурттая, шагьрурдал лагма-ялтту буллалисса хъуни­сса ххуллурдая, муххал ххуллул даврия.

Туризмалул министр Эмин Мердановлул бувсунни цукун­сса масъалартту хьхьичIххуттайн лавсун зий буссарив туризм гьаз дуван ва бувкIцири республикалия рязину личIаншиврул.
Валентина Матвиенкол цаймигу маслихIатру бунни респуб­ликалий экономика гьаз дуван­сса.