Августрал 12-нний Гьун­чIукьатIрал шяраву дия ляличIиссара уттарашин – ши­кку дуллай бия Шяраваллил кьини. Нех дирхьуну най бия шяравун машинартту.

Бадрижамал Аьлиева
Шяраваллил кьини куну ва даву анжагъ бала-гьалайрдайну щаллу хъанахъисса кIану ба­къая. ГьунчIукьатIрал шяраваллил ккурандалул каялувшиндаралу ва кьинилийннин хIадур дурну дия хъуннасса программа. Ши­ккува кIицI лаган, ва шяраваллил жяматрал та-духьурчангу бу­ттал шяраваллихсса ччаву дурну бакIуйн дурксса давурттайну чIалачIи дувайссар, мукунна ва ххуллухьгу.

КIюрххила цал цинявппагу бувккуна хIатталлийн субботникрайн, духмур дуркьун, хIатталлил лагма дирхьуна цIусса сетка. Субботникрая махъ шяраваллил имам Шагьабуттин Къушиевлул бувккуна кьулгьу, бивхьуна зикри.

Хъирив, Шяраваллил кьинилул программалийн бувну, дяшяраву тIиртIуна щарнил патриот, шяраваллил тарихран хасну цимивагу лу чивчусса, шяраваллил ккурандалувугу, гьарца иширавугу хьхьичIунну ивкIсса Амин Аьбдуллаевлун цIа ку­сса мемориал ула. Ванил ялтту дуртсса пардав дуркьуна Аминнул арснал Загьидинал ва душнил Аминал. Хьуна Амин Аьбдуллаевлул оьрмулиясса ихтилатру. Сократ Дандамаевлул, ХIажибутта ХIусайновлул, Зиябуттин ХIажимирзаевлул, Аминнул ссил Сабиратлул ва цайминналгу Аминнуя бусанмур чан­сса бакъая.

Хъирив шяраваллил администрациялул бакIчи МухIад Штанчаевлул тIиртIуна Шяраваллил кьинилун хас дурсса митинг, барча бувна бавтIми Шяраваллил кьинилущал. Махъ лавхъуна ГьунчIукьатIрал шяраваллил ккурандалул каялувчи ХIажибутта ХIусайновлулгу. Цалва ихтилатраву ванал кIицI ларгуна шяраву дуллалисса давурттаву хьхьичIун ливчусса инсантурал цIарду, вайннан дуллуна Грамотартту ва Барчаллагьрал чагъарду. Ва кьини Барчаллагьрал чагъарду буллуминнавух бия мобилизоват увну СВО-рай гьуртту хъана­хъисса Рашид Кьадировлул нину-ппугу. Хъирив ихтилатру бувсса Эдуард Аьбдуллаевлул, Зиябу­ттин ХIажимирзаевлул ва цайминнал кIицI ларгуна шяраву дуллали­сса ва дуван аьркинсса давуртту.

Шиккура «Илчи» кказитрал хъунама редактор Руслан Къардашовлул дурна Загьиди Феодаевлул назмурдал луттирал презентация. Ва хьхьичIва чивчусса лур, тти цIуницIа итабавкьусса, ХIажибутта ХIу­сайновлул хьхьичIмахъгу чивчуну. ГьунчIукьатIрал школалул дуклаки оьрчIал Ххадижат Аьйдиевал, Султан Кьурбановлул, Баянат Къушиевал, Закир Сулаймановлул дурккуна Загьиди Феодаевлул назмурду.
Митинграя махъ лавгуна шяраваллил музейравун. Шивун лархъуна Альберт Хаджаевлул дирхьусса, музейрал сий хъиннура дучIан дуллалисса «ГьунчIукьатIрал аксакалтал» тIисса сурат.

Митинграя махъ хьуна волейболданул ва шахматрал турнирду. Вай сакин дурну дия Юсуп ТIагьировлул ва Кьурбанаьли Ибрагьимовлул.
Волейболданий дуклай дия 4 команда. Вайннахлу буклай трибунардай бия чIявусса болельщиктал. Цалчинмур кIану бувгьуна «ТIагьировхъул» командалул, кIилчинмур – «Администрация» командалул, шамилчинмургу – «ГьунчIукьатIрал жагьилтал» командалул. Ххув хьуминнансса хъунмур бахшиш хIисаврай Малик ХIажиевлул буллуну бия хIайван. ХьхьичIми шиннардийрив ва даву цала бакIрайн ласайссия Сиражуттин Чавтараевлул. Ххув хьусса командалул хIукму бувна цанма бахшишран буллусса хIайван битан шяраваллил ламу бакьин баврин хасну дуллалисса уттичIинсса субботникрай биххан.

Шахматралмур турнир хас дурну дия шяраву дуллалисса давурттавух хьхьичIунну ивкIсса, ванияр кIира шинал хьхьичI аьпалул хьусса Эфенди Мудуновлун. Гьашинумур шахматрал турнир шяраву шамилчинмур хъанай дия. Ваний гьуртту хъанай 34 инсан ия. Гьурттучитал хьхьичIми шиннардийнияр чансса бунугу, турнир цурда хьуна лавайсса даражалий­сса ва дакIний личIансса. Шикку низамрал ва тIайлашиврул ялув бавцIуну бия ГьунчIукьатIрал дянивмур даражалул школалул учитель Асият Маммаева. Ххув хьуми лайкь хьуна Эфенди Мудуновлул кулпатрал чулухасса хъин-хъинсса бахшиширттан.

Вай давурттая махъ шяраваллил жямат бигьалаган, щябикIан лавгуна Оьхрахаллил багъравун, гихунмайсса мажлисгу лахъи лавгуна шикку буллугъсса ссупралух. Ва даву цала бакIрайн ларсун дия Кьурбанаьли Ибрагьимовлул. Оьхрах марцIсса гьавалувух ва уртту-тIутIал кьункьавух хIала хьуну дия Шамил Къардашовлул, МухIад Даудовлул ва Жамила Аьбдуллаевал дурсса нахIу дукрардал кьанкьру.
Гихунмайсса мажлис хьуна шяраваллил Магьирлугърал къатлуву.
Ва хьуна мяйжаннугу шяраваллин ва ванил агьулданун мюнпатсса кьини.