[dropcap]Э[/dropcap]лмулуву ва техникалуву дурсса хьхьичIуннайшивурттахлу ва премиялун лайкь хьуну бур къюкIлий захIматсса операцияртту бувсса Камалуттин Аьбдуллаев, ХIажи Абусов, МахIаммадхIанипа Аскадинов, Зулайхат Дибирова, Расул Ибрагьимов, ХIусман Махачев ва Кахриман Рамалданов. Диагностикалуву ва къашайшалт хъин бувавриву цIу-цIусса кьяйдарду ляркъусса, Рашид Аскерхановлул цIанийсса медициналул центрданул хIакинталгу лайкь хьуну бур вара премиялун.

Вайннал цIарду: Дахир Абуков, ХIамид ва Рашид Аскерхановхъул, Ибрагьим Бадышев, Асланбаг Дубаев, Мажид Казакмурзаев, Арсланхан Кандауров, Ирада Ярахмедова. Филологиялул элмулуву, дагъусттаннал мазурдил грамматика, лексика, лексикография, фольклор ва этнография ахттар дуллалисса монографиярттал хъиривлаявурттахлу Мажид Халилов лайкь хьуну ур премиялун. «Биологические и экономические основы развития форелеводства в Республике Дагестан» тIисса монографиялухлу лайкь хьуну бур Гимбат Гимбатов ва НухIкьади Рабазанов. Литературалул паччахIлугърал премиялун лайкь хьуну бур кIива поэтесса: къумукь мазрайсса «Гьасирет-Наме» («Исповедь страждущей души») луттирахлу Шейтханум Аьлишева ва оьрус мазрайсса назмурдал «Диалоги с Данте» тIисса луттирахлу Миясат Муслимова.

Публицистикалуву премия дуллуну дур яру мазрайсса «Заманалъул матIу» («Зеркало времени») луттирахлу Пайзулла Пайзуллаевлун, театрданул ва кинорал искусстволуву «Жизнь, отданная искусству» тIисса документал журалул киносуратрахлу Александр Евтушенкон ва МахIаммад Сулаймановлун. «XVIII-XX аьсрурдайсса дагъусттаннал хъаннил чIюлушиннарду» луттирахлу ПатIимат ХIамзатован. Республикалул хъунаманал ХIукуматрайн тапшур бунни вай кIицI лавгсса премиярттан 4,5 миллион личIи буван.
ДакIнийхтуну барча буллай буру циняв лауреатътал, вайннавух щалвагу Аьрасатнаву ххуйну кIулсса гьунарданул заллу, поэтесса, публицист, таржумачи Миясат Муслимовагу. Лайкьссия ччянива! Барачатну ларсун хьуннав, цIу-цIусса бахшишру ласлансса цIуллушиву дулуннав!