МахIачкъалалив, Дусшиврул къатлуву, тIиртIунни «В Петровскую гавань заходят корабли» цIанилусса выставка. Ва хас дурну дия Неххал ва хьхьирил флотрал зузалал кьинилун.
Выставка тIитIлатIисса шадлугърай гьуртту хьуна Дусшиврул къатлул каялувчи Саида ЯрахIмадова, МахIачкъалаллал Хьхьирил машлул портрал гендиректорнал хъиривчув ХIажимурад Абашилов, «Росморпортрал» филиалданул каялувчинал хъиривчув Манолис Фулов ва чIявусса цаймигу.
Шикку ихтилат буллай, Саида ЯрахIмадовал увкуна:
– Жулва шагьрулул инсантураща ва хъамаллураща къачIявуну гьан бюхълай бур ва журалул кIанттурдайн, вайннувух Хьхьирил портрайнгу. Утти ччиманаща бюхъантIиссар жучIан бувкIун портрал лавгмунищал ва хIакьинусса оьрмулущал кIул хьун…
Цилва ихтилатраву ванил мукунма кIицI лавгуна портраясса цаппарасса затругу: ва микIкъалачIайсса буссавагу ца порт бушиву; ва хъанахъишиву Аьрасатнал Каспий хьхьирийсса портирдаву яла куртIмур.
ХIажимурад Абашиловлул ххи бувна ва ялагу бушиву «яла чIирисса текучесть кадров» дусса порт, хIакьинугу шикку зий усса ур 20-нния лирчусса шиннардил хьхьичIва зун увкIсса 97 инсан. Аьмнурив шикку зий бур 400-нния ливчусса пишакартал. ХI. Абашиловлул ялагу бувсуна 150-нния лирчусса шиннардил тарих бусса портрал бацIаву дакъа дуллалимуния, ххилаххимуния.
МахIачкъалаллал Хьхьирил машлул портрал тарихрал дайдихьу дур 1870-ку шинацIун дархIусса. Му шинал официальныйну тIивтIуну бур порт.
Лавхъсса мукъурттия, бувсса ихтилатирттая махъ шиккун бавтIми кIул хьуна выставкалущал цищалва. Ккаккиялун дирхьуну дия МахIачкъалаллал Хьхьирил машлул портрал тарихрая бусласимур: суратру, документру, макетру. Архиврал суратирттавасса чIяруми Хьхьирил портрал зузалт заллусса дия.
Хъунмасса гъирарай ххал бунни хъамаллурал МахIачкъалаллал Хьхьирил портрал макет, мукунма жамирдалсса, кьай духхай вагонналсса ва цаймигу. Хасну ва выставкалийнсса суратру дирхьуну дия МахIачкъалаллал шагьрулул оьрчIал искусствардал 8-мур школалийн заназиминнал.
Выставка украссар. Цурдагу зунтIиссар августрал 11-ннин.
