ГьунчIукьатIув, шяраваллил Культуралул къатлуву, Лакрал райондалул бакIчи Юсуп МахIаммадов хьунаавкьунни шяраваллил жяматращал. Ва ххуллухьсса батIаврил агьаммур тема дия контрактрайнусса аьралий къуллугъралмур.
Хьунабакьаврий мукунма гьуртту хьуна райондалул бакIчинал хъиривчув Явсупи ХIамзаев, Лакрал ва Ккуллал районнал аьралий комиссар ХIасан Массуев, КСП-рал председатель Макьсуд Макьсудов, ЧС ГО-рал начальник Надир ХIасанов, шяраваллал жяматирттащалсса даврил уполномоченный АбутIалиб Маммаев, ГьунчIукьатIрал шяраваллил бакIчи МухIад Штанчаев.
БавтIминнал хьхьичI ихтилат буллай, Юсуп МахIаммадовлул кIицI лавгуна хасъсса аьралий операция чара бакъа дуван аьркинсса даву диркIшиву, жулва билаятрал мюхчаншиврул ялун нигьачIаву дияврийн бувну. Жулва жагьилтал нигь дакъа буручлай бушиву билаятрал мурадру, цIанасса ппурттуву язи бугьлай бушиву контракт чирчуну аьралий къуллугъ буллан гьан ччисса инсантал. Контракт чичайссар 1 шинайсса, 3 шинайсса ягу 5 шинайсса. Ва чичин бюхълай бур оьрмулул 18 шинава 60 шинавун бияннинсса инсантураща.
ХIасан Массуевлулмур ихтилатгу бия аьралий къуллугърал контракт чирчуманан буллалисса социал пакетраясса, цайми-цайми къулайшивурттаясса. Ихтилатру бувна цайминналгу.
Ахирданий шяраваллил жяматрайх бавчIуна контрактрайнусса аьралий къуллугърайн багьайсса информация бусса буклетру.
