«Илчилул» 24-мур номерданий дуссия ттула дакIния тачIав къауккайсса, ЧIаящиял шяраватусса СултанмахIадлул арс Ханкиши дакIнийн утлатисса хъун дакъасса макьала.
Чивчумуних ттива-тти урувгсса чIумал, ттун хIисав хьунни ттуйва ца чIиви-хъунсса тахсиргу хьуну бушиву. На кIицI бувссия, Ханкишищал цачIу-чIарах зий, хIала-гьурттуну бивкIсса ЧIаящиял ва ТIюхчардал инсантал. Вай кIивагу жяматрацIун на ххи къабувнува кьабивтун бия Ханкишил ххаллилсса кулпат, оьрмулул дус Саидатлул буттал шяраваллил Къянналмур жямат.

Ханкишил чIарах мудангу бивкIссар Саидатлул гъанчув, уссу Рамазан. БивкIссар мукунма Къяннал бусравсса арсру: Рапи Абакаров, Айгун МахIаммадов, Валериан Абакаров, Сулайман ХIажи-МахIаммадов ва мукунма цаймигу, циняв кIицI буллан хъанай бакъар.
Амма хасну ца-кIива махъ къаувкуну кьаитан къахьунссар сайки гьарцаннал цал цIа бусраврай зумух ласайсса къяничув Къадаев Аьбдулкьасим Къадал арсная. Финансирттал техникум къуртал був­сса ттул дипломрай дуссар Къадаевлул къулбас, госкомиссиялул председатель хIисаврай. Ва ялапар хъанай ивкIсса къатрал чIирай лархъун дуссар ванал суратращалсса аьпалул ула. Ванал лажиндарайва чивчуну бусса хханссар инсаншиврул ва имандалул тарих. Ванащал на архIал чувчIав зий къаивкIссара. Мукун бунугу, ттун ва мудан ттула даврилгу, оьрмулулгу уртакьну ивкIсса куна чIалан икIай.

МахIаммада АьвдулхIамидов,
ДР-лул лайкь хьусса экономист
ш. Гьуйми