Вай гьантрай къуртал хьунни хъинну хъуннасса конкурс дусса Москавуллал Олег Табаковлул театрданул школалийн выпускниктал кьамул буллалисса кампания. Щалагу билаятраясса 4 азаруннийн бияннинсса инсантурал аьрзарду буллусса конкурсрал хIасиллу дурну, школалийн кьамул унни яла лавайми баллу лавсъсса 26 оьрчI.
Миннавух ия Ккурккуллал шяравасса Тамилал арс Шустов Арслан (Лев) Александровичгу.
Арслан чIивинийва ия гьунар бусса, итххявхсса оьрчI. Дуклакисса шиннардий ва чялишну гьуртту шайва школалул жяматийсса давурттаву, республикалий нанисса дуклаки оьрчIал дянивсса цинярдагу мероприятиярттаву. Ва ия шагьрулул хъуними классирттал дуклаки оьрчIал Советрал член.
Школалул, республикалул конкурсирттай гьуртту хьуну, Арсланнул мудангу бугьайва хьхьичIунсса кIанттурду. Ванал дур КIулшивуртту дулаврил управлениялул, ОьрчIал искусствардал школалул, Поэзиялул театрданул, шагьрулул администрациялул чулухасса Грамотартту ва Барчаллагьрал чагъарду. Цимивагу диплом бур шеърирду пасихIну буккаврил конкурсрай ххув хьуну лавсъсса. «Весь мир – театр» тIисса конкурсрай ванал лавсун бур «Яла ххуйма актер» тIисса диплом. Арслан музыкалувугу за бувчIайсса оьрчI ур. Ванал грамотарттаву «За отличное обучение игре на аккордеоне» тIиссагу дур.
МахIачкъалаллал №11 школагу къуртал бувну, Арслан увххун ур Б. Мурадовал цIанийсса Дагъусттаннал Культуралул ва искусстволул колледжравун, театрданул искусстволул отделениялийн. Гьашину, ца курсгу къуртал бувну, цIанихсса Табаковлул театрданул школалийн уххан документру буллуну бур. Ялув кIицI лавгсса куццуй, шиккун хъуннасса конкурс дия. Шикку гьуртту хьун бувкIун бия Новосибирскалия, Пермьрая, Оренбурграя, Тулалия, Москавлия, Екатеринбурграя, Хабаровскалия, хIасил, Аьрасатнал чIявусса шагьрурдаясса оьрчIру ва душру.
– Ва дахьра дайдихьур. Шивун буххан захIматссар, дукланнив хъиннува захIматссар, – увкунни, цIуну хьусса студентътал барча буллай, школалул художественный руководитель Владимир Машковлул.
Жу ххарину буру, укун захIматсса конкурсгу дурурччуну, жула оьрчI Табаковлул театрданул школалийн уххаврия.
Барчагу уллай, чIа тIий буру ванан гьарица ишираву тIайлабацIу, дуккавриву хьхьичIуннайшивуртту. Щак бакъар, Арсланнуя гьунар бусса, тамашачитал ххари буллансса артист хьуншиврийн.
