МахIачкъалаллал «Динамолул» пресс-службалул ларгсса бигьалагай кьини баян бунни Кьурбан Бердыев хъунама тренерну ивтшиву. Ваналгу бувсунни цала клубрал каялувшиву дуван циван бакIрайнласу бувссарив.

– МахIачкъалаллал «Динамо» – агьамсса проектри, ттул гьанумур мурадгу «Динамо» премьер-лигалувун дуккан давур. Укунсса масъала клубрал хьхьичIун лавсун буссар, захIматсса масъалари, амма ццах бутансса цичIав бакъархха, зунтIиссару, – тIий ур цIусса тренер.
Аьрасатнал цачIундур командалул тренерну ивкIсса Борис Игнатьевгу ур Кьурбан Бердыевлул МахIачкъалаллал команда цалчинмур лигалувура хъит учин дувантIишиврий дакI дарцIуну.

– Бердыевлуща цува уттинин зий ивкIсса «Сочилул» даву гьаз дуван къархьунни учин къабучIиссар, тренер цуксса опыт бусса ухьурчагу, мунаща цакуну командалия чемпионтал бан къашайссар. Бяст-ччаллий ттуплий буккайми футболисталли, тренер акъархха. МахIачкъалаллал «Динамолуву» ххуйри триумвират: ХIажи ХIажиев клубрал президент ур, Шамил Газизов – гендиректор ва Кьурбан Бердыев – хъунама тренер. Вай цалчинмур лигалунсса дуниял ккарк-кIулсса барцIрур, вай цачIун шаву гьаксса ххуйри, уртакьну зий, командалул ххуйсса хIасиллу хьун дувантIиссар, – увкунни ванал.
Июльданул 15-нний «Динамо» ччаллий дуккантIиссар ФНЛ-лул цалчинмур турданул лагрулий «Торпедолущал».