Июльданул мяйлчинмур кьини Аьрасатнаву кIицI лагай Кулпатрал, ччаврил ва дакIру тIайлашиврул кьини хIисаврай. Ва байрандалуцIун бавхIуну Дагъусттаннайгу барча бувай чIярусса шиннардий бавкьуну, нахIуну яхъанахъисса, агьалинаву хIурмат багьанну занакьулу хъанахъисса хьхьичIунсса кулпатру. Аьдатрайсса ХIурматрал грамотартту, кIяла тIутIал кацIру булай, барчаллагьрайсса махъру увкуну, ххари бувай. Республикалул захIматрал ва социал иширттал министр М. Казиевлул цIанияту барча бувминнавух бур МахIачкъалалив яхъанахъисса, 1-мур ЦIувкIратусса Арсен ва Зоя Исрапиловхъал кулпатгу.
Вайннал цачIу яхъанай 43 шин хьуну дур. Анвардул арс Арсен зий ур Республикалул стоматологиялул поликлиникалий ккарччал хIакинну, ва аралуву зий ванал 40-нниха лирчусса шинну хьуну дур. Ва цувагу ларайсса категориялул хIакингу, Дагъусттаннал лайкь хьусса хIакингу ур. Исмяиллул душ Зоя зий бивкIун бур товароведну, ва захIматрал ветеран бур. Вайннал мукьва оьрчI хъуни бувну, лайкьну чивун буккан бувну бур, ларайсса кIулшивурттугу дуллуну. Вайннал душ Диана зий бур «Надежда» тIисса Республикалул центрданул директорну (и.о.). Арс Анвар зий ур ТIабиаьт дуруччаврил министерстволий паччахIлугърал экологиялул надзорданул управлениялул хъунаману. Арслан тIима арс кIава ппу зузисса Республикалул стоматологиялул поликлиникалий ккарччал хIакинну зий ур.
Душ Мадина, хIакин-терапевт, зий бур Республикалул диагностикалул центрданий. Вайннал цала бусаврийн бувну, ларайсса диркIун дур Арсеннул ва Зоял оьрчIаясса тIалавшинна, дуккавривугу, мяърипатравугу.
«Гьай-гьай, цIакьсса кулпат – гьарца кьини ссавурданий ва ччавулий бихьлахьисса захIматрал хIасилли, кIинналагу хIарачатри, учалагума бурхха, «кIия лачIурчан, кьун бутайссар» тIисса. Ва учалалуву тIийкун къуццу тIий бивкIссару оьрмулухун, уттигу вава тарапрай архIалну хъар ларсун най буссару», – тIий бур Зоя.
Арсеннул ва Зоял кулпат шяраваллил агьулданул дянив бикIу, чIаххув-чIарахнал, кIулцириннал дянив бикIу ца яла хIурмат бумур кулпатри. Вайннал цалва оьрчIругу, цивппа кунма, захIмат ххирану, инсаншиву хьхьичIунну, мяърипат дуну тарбия бувну бур. Ва кулпатрахь барчаллагь учин, грамота ва «За любовь и верность» медаль дулун оьвкуну бия МахIачкъала шагьрулул соцзащиталул управлениялийн.
Медаль дуллай, кIицI лавгсса управлениялул директорнал хъиривчув Есения Исрапиловал увкунни: «Кулпатраву кьиматрайсса ххазинардал ва цIакьсса ташулул лишанну хъанахъисса ва байран 10 шинал тарих бусса байранни. Ва медаль дулайссар цайминнан ккаккиялунну яхъанахъисса кулпатирттан. Арсеннул ва Зоял кулпатгу махъминнан эбратрансса кулпат бур. Укунсса кулпатирттан кьимат бищлай, жува жагьилсса никирангу цIакьсса ташурдал, ххуйсса кулпатирттал кьадру бикIан аьркиншиву ккаккан буллалиссару. ЧIяву хьуннав Дагъусттаннай цIакьсса ташурду!».
Кулпатру цIакьссакссар, билаятгу цIакьсса учарухха. ЦIуллушиву дулуннав зухьхьун, Арсен ва Зояй!
