ЦIуссалакрал райондалий къуртал хъанай дур инттусса призыврал кампания. Апрель зурул 1-нния байбивхьуну райондалул ва шяраваллал администрациярду, военно-учетный столлал пишакартал ва военкомат аьралуннаву къуллугъ бан жагьилтал тIайла буклай буссия.
Хъуннасса даву дунни вайннал, повесткартту дуллай, нитти-буттащал ва цинявппа призывниктуращал ихтилатру буллай, мукунма республикалул кьатIувсса призывниктурайн баян буллай.
Инттусса призыврал кампаниялий аьралуннаву къуллугъ буллан бувцунни 18-27 шиннавусса жагьилтал. КIицI лаган, вай шинайсса къуллугъ буллантIиссар цивппа тIайла бувксса аьралий частирдаву. Вай гьуртту къахьунтIиссар хасъсса аьралий операциялий, мукунма къагьантIиссар къуллугъ буллан Аьрасатнал цIусса районнайн – Луганскалийн, Донецкалийн, Запорожуллал ва Херсоннал областирдайн. Призыврал кампания къуртал хъанахъиссар июльданул 15-нний.
