АьФ-лул ПаччахIлугърал Думалул депутат Жамалуттин ХIасановлул бахшиш дунни спортрал инвентарь ЦIуссалакрал райондалул школардачIасса лагерьдан.
Июльданул 7-нний «Дружба» тIисса ЦIуссачIурттащиял 2-мур школалучIасса дяхттасса лагерьданийн увкIунни АьФ-лул ПаччахIлугърал Думалул депутат Жамалуттин ХIасановлул кумагчи, Дунияллул халкьуннал дянивсса Жяматийсса палаталул президиумрал член Керимхан Умаханов. Бусравсса хъамаличув хьунаавкьунни райондалул КIулшиву дулаврил управлениялул хъунмур Светлана Кудаевал, ЦIуссачIурттащиял 2-мур школалул директор Аьли МахIаммадовлул, Банайюртуллал школалул директор Арслан Шариповлул, мукунма лагерьданийсса оьрчIал ва тарбиячитурал. Керимхан Умахановлул барча бунни оьрчIру ва тарбиячитал депутатнал ва цала цIания, бувсунни цува райондалийн учIаврил мурад: гъинттул оьрчIру бигьалагаврил, ми спортрахун ва культуралул иширттахун бичаврил, терроризмалийн ва экстремизмалийн къарши бацIаврил даврин кабакьу баву.
Ванал Светлана Кудаеващал ва лагерьданул директорнащал ххал бунни дукра дайсса ва дукайсса кIанттурду, бигьалаглагиминнал дука-хIачIиялул тагьар. Мукунма вай бувккунни школалул лагма, ххал бунни спортрал заллу ва майданну, ихтилат хьунни туризм хьхьичIуннай даврил хIакъираву.
Хъирив вай бувкIунни школалул хIаятраву дацIан дурсса Аьрасатнал Виричув Алексей Козиннул гьайкалданучIан. ДакIнийн бутан, лейтенант Алексей Козиннул жан дуллуссар 1999 шинал сентябрьданий райондалий най бивкIсса дяъвилул иширттаву. Хъамаличувнал, виричувгу дакIнийн увтун, райондалул вакилтуращал гьайкалданучIа сурат рирщунни.
Ахирданий Керимханнул депутатнал ва цала чулухасса бахшишру дуллунни. Миннувух бия ттупру, теннисрал ракеткарду, обручру, сурат дишин аьркинмур. Укуннасса бахшишру депутатнал Банайюртуллал школалучIасса лагерьданийсса оьрчIангу дунни. Светлана Кудаевал ва школардал директортурал барчаллагь увкунни гъинтнил лагерьдан, аьмну кIулшивуртту дулаврин кабакьу буллалиминнахь.
