Ларгсса бигьалагай кьини, июльданул 9-нний, МахIачкъалаллал Хъун- мизитрачIа кIюрххила гъирарай батIлай бия 1-мур ЦIувкIуллал шяравасса душру. Бия Лаккуя бувкIссагу, шагьрурдаяссагу. Вай мубараксса щайхтурал зияратирттайн биян аьрххилий бувксса душру бия. ЦIувкIуллал шяраваллил тарихраву ва хьхьичIра-хьхьичI дуллалисса даву дия. Ванил сиптачиталгу бия Муфтиятрал Ккуллал райондалийсса просвещениялул отделданул хъунама ва ЦIувкIуллал имам Муса Аьлиев, вава Ккуллал ва Лакрал районнал Просвещениялул отделданул хъаннилмур бутIул хъунмур ПатIима Аьлие­ва ва Муфтиятрал ЦIуссалакрал райондалийсса просвещениялул отделданул зузала, 1-мур ЦIувкIратусса Ххадижат Аьбдуллаева.

КIива маршрутка бучIан бувна Хъун-мизитрачIан, тичча бавчуна Сепараторный поселокрайсса Дагъусттаннал муфти, щайх АхIмад-хIажи Аьбдуллаевлул къатрачIан. Муфтинал маслихIатрайсса ихтилатрахгу вичIи дирхьуну, Буйнакскаллал райондалийн аьрххи бавхIуна. Цал вай бивуна Ялув Гъазанишливсса Ухссавнил Ккавкказуллал цалчинма муфти, НицIавкIратусса щайх, 3 тIарикьатрал устаз Сайпуллагь-Кьади Башларовлул зияратрайн, яла бивуна ЧиркIайннал Саэд-Апаннинал зияратрайн.
ПатIимат Зиркьуева: «Жу ва кьини, ссурвавращал архIал зияратирттайн биян бюхъаврийнгу щукрулий, дуаьрдай бивкIру. Кондиционердугу дусса хъинну къулайсса маршруткартту бия. Куклуну, тазану бивру нанинийн.

Сайки цинявннал зумувсса яла чIяруну тикрал дуллалимур дуаь ва кьини духьун­ссия дунияллийн дакьаву дагьаннав, Украиннал аьрщарай жанну дуллуминнал аьпа баннав, буми цIуллуну зана хьуннав тIутIисса. Цинявгу душваврал цIанияту барчаллагьрай бура, ва давриха зузиминнал буниялттунгу биялсса хIарачат бивхьуну бия лайкьсса даражалийсса даву щаллу дуван. Мяйжаннугу, ца зумату кунма, циняв дакIру чаннасса, тIааьнсса асардал дурцIуну дур тIий бия. Укунсса аьрххирдал жува гъангу буллалиссару, жулла дакIурдиву имангу цIакь дуллалиссар. Аллагьнал жухьхьунна мукьахунмайгу зияратирттайн занансса тавпикь дулуннав. КIицI ларгсса давриха зий бивкIминнал захIмат Заннан кьамулну лякъиннав. Жува зияратирттайн бияврил барачат щалвагу ЦIувкIуллал жяматрайн, щалвагу миллатрайн бияннав!».

Эльмира Хизриева: «ТIайла­мур бусан, на цIубутIуй ташвишнугума бивкIра, буккан хъинавав, кIиришивугу духьувкун, тIий. Хъинну рязину бувкIра, бучIан шайми бувкIунни, ва хъиндайдихьур, укунсса давуртту гихуннайгу дулланссар тIий, ва даврил сиптачитурайн барчаллагьрай бура».
Умамат ХIусайнова: «На личIину диндалул инсангу бакъара, ххюцIалла шинай ЦIувкIуллал школалий дарс дихьлай бивкIсса инсан бура, хIакьинусса кьинигу дихьлайнма бура. Амма, шяравудушру укун зияратирттайн нанисса хавар шайхту, гьуртту хьун хьхьичIунмай хьура. Ва аьрххи цIувкIуллал душру исламрал ххуллийн кIункIу бувансса, исламрал ххуллийх наниминнал дакIурдиву иман цIакь дувансса даву хьуссар тIий бура».

Светлана Кьадилаева: «Зияратирттайн нани ххуллий ихтилатру буллалиминнал кIицI лавгунни, исламрал ххуллу-ххагу цIакьну бурувччуну, жагьилсса никирал ва оьрчIал тарбиялухгу дагьайкун­сса къулагъас дикIан аьркиншиву хъуниминнал, жулва ппухъруннал рувхIанийсса ирс-ххазина буру­ччин аьркиншиву. ДакIний ххаришиву дия жулва ЦIувкIуллал душвавраву исламрал ххуллу-ххуттай цIакьну бавцIусса, къакIулмур жунма лахьхьин буллалисса Ххадижат Аьбдуллаева бушиврия, пасихIну зукьлу-дуаь дуван кIулсса ПатIимат Зиркьуева бушиврия. Ва жул наставникри. Цаймигу бур ЦIувкIуллал душвавраву исламрал кIулшивуртту куртIгу, цIакьгу дуллалисса, вайннул кабакьаврийну, ин ша Аллагь, жугу хъит тIунтIиссару. Рув­хIанийсса ххуйшивурттал дакIругу дуцIин дурну бувкIру зияратирттая».

Ттуща, цамур мероприятие дуну, ва кьини ссурвавращал буккан къавхьунни, амма ва кьинигу, хъирив гьантрайгу дакIнива къалавгунни вай жула душваврал зияратирттайн лагавриятусса ххаришивугу, рязишивугу. Вайннул дурцирив дуаьрттацIун бакьлай, Аллагьнал жула дакIурдивун Идавсихсса (с.аь.с.) ччаву дутIиннав, Мунал (с.аь.с.) ккаккан бувсса ххуллийх бачин каши дулуннав, дунияллийн паракьатшиву дагьаннав тIий бура нагу. Амин!