Карашрал ва ГьунчIукьатIрал шяраваллава бувккун, Лакрал райондалийх нанисса ххуллул шанбачIулий хIисав шайхьун­ссия дякъивух, гъаралух, кIири бувсса бургъилух транспортрах ялугьлай, щябикIансса кIану бакъа, бавцIусса инсантал. Вана утти буруччинсса кIану хьуну – бургияра суратрах.

Вай гьантрай «Илчи» кказитрал редакциялийн бувкIунни ГьунчIукьатIрал ва Карашрал жяматирттал чулуха ва ххаллилсса даврил сиптачину хьу­сса, Карашрал шяравасса, Абакардул арс МахIаммад Башировлуйн барчаллагь баян буллали­сса чагъар. Цува МахIаммад ур кIа муксса кIицI лаглансса хъуннасса даву дакъар, щинчIав кIул хьуну ччайгу къаивкIра тIий.

– На ччя-ччяни ияйссара тту­ла буттал шяравун. Ххуллийн бувккун, дякъивух, гъаравух бавцIусса инсантурай мудан я бацIлан бикIайва. Му иш асар хьуну, кIира шинал хьхьичIва уссияв кIикку ххуллулсса бацIавансса кIану бан­сса пикрилий. Ттула мажал ба­къашиврул лахъи ларгунни ва даву. Шикку ттукI ба­къая, генераторгу лавсун бувкIун, дарду чIирисса даву. «УрчIа канил дурмур куямунин кIул къахьунну» дан ччай ивкIра. Мудангу хIадурссара ттула буттал миналуцIун бавхIусса гьарцагу масъалалул чIарав ацIлан, – тIий ур МахIаммад.

КIицI лаганна МахIаммад мазгу, миллатгу ххира­сса инсан ушиву. Цуксса цува къайгъурдавун лавгун, мажал бакъа ухьурчангу, ччя-ччяни лякъай буттал шяравун иянсса чIун. Ххирар ванан цала жямат. Ва шяраву дуллалисса гьарцагу даврил чIаравгу ацIай, бунияла­сса патриотгу ур. Шяраву дурну дур цIусса ххаллилсса къатригу. МахIаммад, барчаллагь хъунмасса! Хъиннура ххишала хьу­ннав вил каши, кьудрат.