Гъумук, Лакрал райондалул администрациялул залдануву, хъуннасса шадлугърай кIицI ларгунни «Ххяххабаргъ» кказитрал 100 шинал юбилей.

[dropcap]М[/dropcap]у агьамшиву ххисса мажлисрай гьурттушиву дуллай бия Лакрал райондалул бакIчи Юсуп МахIаммадов, «Илчи» кказитрал хъунама редактор Руслан Башаев, журналистикалул ветерантал, райондалул идарарттал каялувчитал, школарттал директортал, бусравсса хъамал ва цуппа «Ххяххабургъил» коллектив.

Совет власть сакин хьуну дурагу кIира-шанна шинава, 1923-кусса шинал, Гъумук бувккун бур дунияллийн «ЗахIматчи» тIисса цIанилусса райондалул кказит, Лакрал РКП-лул окружной комитетрал ва исполкомрал орган хIисаврайсса. «ЗахIматчи» кказитрал цалчинма редакторну хьуну ур чичу, революционер, журналист Ибрагьим-Халил Кьурбанаьлиев. Муния махъ кказитрал цIа даххана хьуну дур шамийлла – «ЗахIматчи» («Труженик»), «ЦIусса ххуллу» («Новый путь»), «Ххяххабаргъ» («Заря»).

[dropcap]М[/dropcap]ажлис бачин бувну ия Лакрал райондалул хъунама Юсуп МахIаммадов. Мунал лавхъуна «Ххяххабургъил» коллектив барча буллалисса ва райондалул тарихраву кказитрал бугьлай бивкIсса ва хIакьинугу бугьлагьисса агьамсса кIанттуясса махъ. Муния махъ райондалул бакIчинал дуллуна кказитрал хьхьичIунсса зузалтран администрациялул чулухасса ХIурматрал грамотартту. Ми хIалал дурминнавух бия: журналистикалул ветерантал Анисат Мусаева, Мирама Акаева, Дамадан Шамхалов, сетевой изданиялул редактор АьбдулхIамид Аьли­шаев, компьютерданул оператор Рабият Жалиева, штатрай бакъасса корреспондент Марина Хизриева.

«Ххяххабаргъ» кказитрал хъунама редактор Мусалав Мусалаевлул бувна кказитрал хъунмасса тарихрацIунгу, хIакьинусса кьинилуцIунгу бавхIусса гьарта-гьарзасса доклад.
Хъирив республикалул «Ил­чи» кказитрал хъунама редактор Руслан Башаевлул дуллуна Дагъус­ттан Республикалул Информациялул ва печатьрал агентстволул цIаниясса ХIурматрал грамотартту. Ми лайкь дурмину бия «Ххяххабаргъ» кказитрал хъунмур бухгалтер Мамлакат Богачева ва кказитрал дизайнер Аскандар Абакаров.
БавтIминнал хьхьичI ялагу махъру лавхъуна Мирама Акаевал, ГьунчIукьатIрал школалул директор Малик Къушиевлул, ниттил мазрал учитель, шаэр Аьвдулмажид Исмяиловлул.

Ахирданий Лакрал райондалул Культуралул къатлул коллективрал ккаккан дурна концерт.