Ккуллал райондалул администрациялул бакIчи Шамил Рамазанов хьунаавкьунни СВО-райн мобилизоват увну ивкIсса, цIана отпускалий шавай зана хьусса Хъусращиял шяравасса ­Оьмаев Назимлущал.

Мобилизация баян бувния махъ СВО-рай гьуртту хъанай ивкIсса Назим цалчинни цала нитти-буттачIан, кулпатрачIан иян увкIсса.
Хьунабакьаврий Назимлул бувсунни цала аьралий къуллугърая, архIал талатисса гьалмахтурал къучагъшиврия ва хьунадакьлакьисса захIматшивурттая. Барчаллагь увкунни СВО-рай гьуртту хъанахъисса аьралитуран буллалисса кумаграхлу ва мобилизоват бувминнал кулпатирттах дуллалисса аякьалухлу.
Райондалул бакIчиналгу кIицI лавгунни, мудангу ххарину ушиву СВО-рай гьуртту хъанахъисса аьралитуращал хьунаакьлан ва миннах цащара шай­сса аякьа дуллан.
– Бигьану бакъар хIакьину жулва жагьилтуран. Цимилгу ккаккан бунни жула аьралитурал цивппа цалва къуллугърал буржру дакIнийхтуну бартбигьлай бушиву. Назимлун ва хIакьину къуллугърал буржру бартбигьлагьисса цинявппагу аьралитуран чIа тIий ура, ххувшавугу ларсун, цIуллуну-сагъну махъунмай зана шаву, – увкунни Шамил Рамазановлул.
Шиккува кIицI лаган, СВО-рай гьуртту хьун лавгсса Назимлуя жун уттинингу цикссагу ххуйсса хаварду баяйва. Ванащал архIалсса жула ла­ккуоьрчIру буслай бия Назим хъинну захIмат ххирасса, канива букъаккайсса пиша бакъасса, аьралитуращалгу авкьусса, хъинну ххуйсса инсан ур тIий.
Оьрмулун къулайсса шартIру дакъасса окопирттаву ялапар хьун багьсса аьралитал, Назимлул кумаграйну бувцуну ттукIгу, чIумуйнусса ялапар хьунсса шартIругу дузал дурну, аьралий буржру бартбигьлай бур. Лагма-ялттусса окопирттаву ялапар хьунсса шартIру дакъар тIий аьрзирайсса аьралитурахь командир тIий ивкIун ур: «Бургияра ва дагъусттанлувнал дурсса давурттах, вагу зу кунасса аьра­личуври, ваная эбрат ласияра», – тIий.