Июльданул 10-нний хьунни Республикалул Жяматийсса палаталул мяйлчинмур созыврал заседание. Шикку бувчIунни палаталул хъунама ва ванал хъиривми. ЧIявуминнал чIурду буллуну, Жяматийсса палаталул хъунаману увчIунни Аьзизбаг Черкесов. Ванал хъиривмину бувчIунни Шамсият Насруллаева, Ссапарбаг Аьбдуллаев ва Абсалуттин Мурзаев.

 

Уллубийл арс Аьзизбаг Докузпариннал райондалийсса Усухчай шяраватусса ур, зий ивкIун ур Аьрасатнал ФСКН-лул Дагъусттаннайсса управлениялул хъунаману, къуллугъ кьабивтсса налогирттал полициянал генерал-майор ур.

Вара заседаниялий бувчIунни палаталул комиссиярдал хъунимигу. Диннал ва миллатирттал дянивсса арардал­сса буллантIисса комиссиялул хъунама ивтунни Руслан Луговой, ЦIуллушиврулсса ва социал политикалулсса – Руслан МахIаммадов, Жагьилтурал иширтталсса, спортралсса ва патриот тарбия дулаврилсса – Аьлибаг Казанбиев, КIулшиву дулаврил, элмулул ва культуралул – Бика Аьлиева, Экономикалул политикалул, туризмалул ва экологиялул, бизнесрал ва АПК-лул масъалартталсса буллантIисса комиссиялул – Юкруттин Салимханов. Интизар Мамутаева бивтунни Ветерантурал иширтталсса, аьралитурал кулпатиртталсса буллантIисса комиссиялул хъунмурну, Мамма Маммаев – Строительстволул, архитектуралул ва ЖКХ-лул масъалар­тталсса буллантIисса комиссиялул хъунаману. Кахриман Аьшу­ров Инсантурал граждан ихтиярду дуруччавриха зунтIисса комиссиялул хъунаману ивтунни.

ДакIнийхтуну барча буллай буру Жяматийсса палаталувун бувчIуми, хаснува лакрал вакилтал – Ссапарбаг Аьбдуллаев ва Мамма Маммаев. Ссапарбаг Аьбдуллаев ва палаталул давриву уттинингу цува бюхъу-хIарачат бусса, агьалинал къайгъурдалсса буван чялиш увкнувасса активист ушиву ккаккан бувсса инсан ур, Мамма Маммаевгу машгьурну ур бюхъу б­сса жяматийсса ишккакку хIи­саврай. ЧIа учинну вайннан тIай­лабацIу!