Июнь зурул 26-нний, Дагъусттаннал ва Чачаннал имам Шамиллун 226 шин хъанахъисса кьини, МахIачкъалалив, Ухссавнил Ккавкказуллал гуманитар колледжраву хьунни хъунасса полководец дакIнийн утлатисса кьини. Ва колледж цуппагу имам Шамиллул цIанийссар.
Мероприятие хIадур дурну дия колледж ва Имам Шамиллул фонд уртакьну. Бусалардавун агьсса имам дакIнийн утан бавтIун бия Дагъусттаннал интеллигенция ва жяматийсса ккураннал вакилтал, активистътал, журналистътал. Мероприятие дачин дурну ия кIицI лавгсса фондрал хъунама АьлиасхIаб Хархачев. «Имам Шамил дакIнийн утлатисса кьини ва так лавгзаманнул аьпалул кьини дакъарча, бучIантIимунийнсса вихшалдарал кьинигур.
Жунма жулва мархри, гьанурду хъама битан къабучIиссар, мархригу, аьдатругу дакIниву духьурча, бучIантIимур чаннасса хьунтIишиврийнсса умудгу буссар. Имам Шамил талай ивкIссар жула аьрщарал тархъаншиврухлу, тIайлашиврухлу, инсаннал ихтиярду дуруччаврихлу», – увкунни ванал. Ихтилатру бувминнал чIурчIав дунни Имам Шамиллул оьрмулул ххуллия чара бакъа ялун нанисса никирахь буслан аьркиншиврий, оьрчIру ва жагьилтал тарихрал хIурмат буну, культуралул, мазрал, аьдатирттал кьимат буну тарбия хъананшиврий.
