Буттал кIанттул цIанийсса Хъунмасса дяъви байбивхьусса Аьпалул ва хажалатрал кьини жува дакIнийн бичару та дяъвилул цIараву, фашистътурал дуснакьирттай жанну дуллуми, мукунма къинттуллух цикссагу къювурду духIлай бивкIми. Жандалий хIайп къаувкуну Ватан дуручлай бивкIми жунма абадлий дакIний бикIантIиссар.
Июнь зурул 22-нний Гъумукгу дакIнийн бивчунни Ватан душманная дуручлай жанну дуллуми. Буттал кIанттул цIанийсса Хъунмасса дяъви байбивхьуну 82 шин шаврин хас дурсса митинграй гьуртту хьунни райондалул бакIчи Юсуп МахIаммадов, райондалул идарарттал зузалт, шяраваллил жямат, Гъумучиял Искусствардал школалул дуклаки оьрчIру. Мероприятие дайдирхьунни 1941-1945 шиннардийсса дяъвилий жанну дуллуминнал гьайкалдануцI тIутIив дишаврийну.
– Буттал кIанттул цIанийсса Хъунмасса дяъви жула Ватандалийх дурксса ца яла захIматмур кьинину хьуссар. Му кьини жула халкьуннал лайкьну лархъссар. Жунна тачIав хъамакъаритантIиссар Ватан душманная дуручлай жула вирттаврал ккаккан дурсса чувшиву. ХIакьинугу жула аьралитуран, билаятрал мурадру буручлай, ярагъ кIунттил бугьан багьунни. Жула мюхчаншиврул цIаний бавцIуну, вай лайкьну буручлай бур Буттал кIанттул цIанийсса Хъун дяъвилий бюхттулсса Ххувшаву ларсъсса саллатIнал чувшиврул ирс, – увкунни райондалул бакIчинал.
Митинграй мукунма ихтилатру бунни райондалул аьралий комиссариатрал призыврал отделениялул хъунама Ажуб Юсуповлул, райондалул Ветерантурал советрал председатель Сулайман ХIажиевлул ва м.ц.
Ихтилатру къуртал хьуну махъ дяъвилий жанну дуллуминнал аьпалун баян бунни минутрайсса пахъ багьаву, дирхьунни гьайкалдануцI тIутIив. Хъирив Искусствардал школалул дуклаки оьрчIал дурккунни назмурду.
