Вай гьантрай мубараксса Маккаллал аьрщарай хIаж буллай бур дунияллийцири бусурмантал. Гьашину, коронавирусрал азар сававсса къадагъа дакъахьувкун, Аьрабусттаннал паччахIлугърал кIива миллион инсаннан визарду дуллуну дур.
Вайксса дулайссия коронавирусрал азар ппив хьун хьхьичIсса шиннардий, пандемиялия махъ тIурчарив, ва рекордран ккаллисса цифрар. Аьрасатнава хIаж буллай уссар 25 азара инсан. Дагъусттаннал муфтинал хъиривчу МухIаммад Мангуевлул пресс-конференциялий баян бувсса куццуй, Дагъусттанная лавгун ур аьмну 10 азара инсан. ХIажлийн лавгцири чичлай бур, цуксса гужсса кIиришиву духьурчагу, шавкьиравун лавгун, тазану хIаж буллай, тIавафру дуллай, диндалул аьдатру дуллай бушиву. Мубараксса кIанттурдайн бусурман биян буллай буссар дирива-дирисса электропоездирттай. ХIаж буллалиминнансса къулайшиндаран кумагчиталну дур роботру, диндалия цIувххумунихьхьун арулц1алва мазрай жаваб дуллалисса.
ЦIуллуну зана хьуннав жулва хIажитал, вайннал хIажлил барачат щалвагу миллатрайн, дагъусттанлувтурайн бияннав! Заннал кьамул буваннав кьурбанну бивхнал кьурбан, бувсса цадакьартту ва цаймигу хъиншивуртту кьамул дурну, миннуясса чири ххи хьуннав.
