ЦIуссалакрал райондалул агьалигу гьуртту хьунни Щалагу Аьрасатнаву нанисса «Особенности национальной уборки» тIисса экологиялул акциялий.
ЦIуминалийсса администрациялул, Культуралул управлениялул, КЦСОН-далул ва шяраваллал администрациярттал зузалтрал ччюрклицIа марцI бунни «Лунный берег» пляж. Ва кьини шичча дартIунни кIира тонналия лирчусса ччюрк. Пляж марцI бан ишла дурну дия хасъсса техника. Вай давурттавух мукунма гьуртту хьунни райондалул «Цалчинминнал суккушиннарал» активистътал. Акциялул мурад бия жула лагма-ялттусса тIабиаьтрахсса ччаву ва му дуруччинсса жаваблувшинна тарбия даву.
Мероприятиялул лагрулий, шикку гьуртту хъанахъиминнал ххал бивгьунни райондалул шяраваллаву «Формирование комфортной среды» проект щаллу баврил масъала. ДакIнийн бутан, ва федерал проектрал агьаммур мурад хъанахъиссар шагьрурдай ва шяраваллаву агьалинал багьу-бизу ва культуралул оьрмулул даража чIаланну гьаз баву. Нанисса шинал райондалий проект щаллу дуллалисса давуртту дан тIий бур ЦIуссаккуллал (Чаравали) ва ТIюхчардал шяраваллаву.
