Ххуйсса бакIлахъия ласавриву агьамсса кIану бугьлай бур дургьумунийн щин дуртIусса куццул. Щин чан хьурча, чIапIив кIура-кIура баллан, щюллимур хъахъи лаглан, тIутIайх дирчумур зизлан дикIай. ЧIяру хьурчангу, мархри аьллай байбишай, хьусса ахънилссагу щинаталайсса дикIай.
Щин дутIаврия
Ссайн
ва цукун дутIин аьркинссар щин?
Ахънилссаннул, инсантурал кунна, дур цалла-цалла хасият, цавайннун ххирар чIярусса ва нажагь дуртIусса щин, цайминнун – чан-чанну ва чIяруну дуртIуми. КIирисса чIумал сайки гьарцагу ахънилссаннуйн щин кIюрххилнияр ахттакьуннай дирхьуну хъинссар. Агана кIюрххил дутIин багьлагьисса иш бухьурча, ва даву шайссаксса ччяни дуван аьркинссар, ххяххиялул чIапIайн багьми щинал кIунтIру баргъ кIири булланнин кьакьаншиврул.
Помидор
Помидорданийн, каландалийн, бадиржандалийн щин ялтту пурх дурну къахъинссар. Вай ахънилссаннун къаххирассар щин бакIрайн дутIлай.
Помидорданийн щин дутIин аьркинссар нюжмардий 1-2, цирдагу куртIну мархравун диянну, гьарца къатIун 5 литра хIисав дурну, аьрщи дякъахханну, щин чанну нани дурну, мархралун дирхьуну. Помидор тIутIайх дирчусса чIумал гьарца къатIунсса щин 5 литралия 1-2 литралийн дагьанну чан дуван аьркинссар.
КъатIуйсса чIапIив, тIутIив ва помидор цирда щин дутIлайна кьаркьун личIан аьркинссар, щин дутIин аьркинссар вайннуйн щинал кIунтIру къабагьанну.
Щин чIяруну дутIлатIисса помидор щинаталайсса, тIин къатIааьнсса дикIайссар, цирдагу хъяхъа тIун дикIайссар. ЧIярусса ва ялтту дуртIусса щин сававну ххяххиярттай личIи-личIисса азарду сукку шайссар.
Гьантри кIириний помидорданийн щин ахттакьуннай дирхьуну хъинссар, гьунттиймур кьини баргъ кIири баннин ххяххиярттачIа щиная мюнпат ласунсса, ми лялиян дувансса чIун дикIаншиврул ва кIири байхтугу, цавурасса хъатру гьаваллавун нани дуллай, ххяххияртту дюхлул хъананшиврул.
Помидордал мархравусса хъатру хъунмасса хIаллай яхьуншиврул вай мульчировать дурну хъинссар, яни къатIул лагма ссал-дунугу къат дурну, нухьхьал, ххулуврал, опилкарттал ягу кьаркьсса урттул (так гьанна хьуннин рирттусса уртту духьурча).
Дахьра дургьусса помидорданийн цал ххуйну дирхьуну щин, яла ца-кIива гьантлий щин дурагу къадирхьуну хъинссар.
