Жу хьхьичIмур номерданий бувсъссия Цалчинмур ЦIувкIратусса пагьламан Камил Маммаев «Россия-1» телеканалданийсса машгьурсса «Удивительные люди» тIисса шоулий гьуртту хьушиву ва цания-ца нюжмаркьини передача ккаккан дувантIишиву.

Вана ларгсса нюжмаркьини дия му шоулул тIайланнасса эфир. Камиллул номер программалул студиялуву бакъая, студиялуву дан шайсса давугу дакъая. Камил мукьцIалла метралул лахъну дархIусса архъандалийх лавхъунни, архъанмур дархIуну дия гьаваллаву ца шардания тамунийн. Ва трюкрал съемкарду дуваншиврул группа Подмосковьеливсса майданнив бувккун бур. Хореограф ва телеведущий Евгений Папунаишвили мукIру хьунни, Камил гьавалул шардай дархIусса архъандалийх нанийни, цува дакIнивусса ццахлил урганагу къахъанай ивкIшиву. «Агана пагьламан тталлацIун, хIатта ххяллацIун цIакь дурсса архъандалийх лахъарча, му личIири. Камилма щурущисса шардацIун дархIусса архъандалийх лавхъунни», – увкунни ванал.
Бюхттулсса кьимат бивщунни шоулул жюрилулгу ванал гьунарданун. «Шоулул тарихраву на цалчин аавхъун тамаша бувну ивкIра, махIатталла, хIайранна», – увкунни жюрилул член, нейробиолог Василий Ключаревлул. Аьлимчунал бувсунни укунсса трюк дуллалисса ппурттуву бакIрал нярал циняр отделлу зун дикIайшиву. Камил цувагу машгьурсса телешоулий сивсуну, хъярчру хIалану, иминну пиш тIий гъалгъа тIий ия. ЦIувкIуллал шяраваллийн ванал «столица канатоходцев» увкунни, бувсунни пагьламантурал искусствалия, аьдатирттая. Бусан ливчIунни Камиллул трюкрахлу чIу буллушиву тамашачитурал мукьцIалва процентрал, вайми гьурттучитурахлу ва ванахлу буллусса чIурдал дянив хъуннасса тапаватшиву душиву. Вагу машгьурсса шоулул тарихраву уттинин къавхьусса иш бур. ЧIявуми дакI дарцIуну бур шоулул финалистътуравугу Камил ххув хьунтIишиврий. ТIайлабацIу баннав!
Суратру: Камил Маммаевлул Телеграм-каналдания (https://t.me/balance05)