Дагъусттаннал ХIукуматрал хъунама Аьбдулмуслим Аьбдулмуслимовлул тапшур бувну, Буйнакскалив гужсса микI бивчуну махъ агьалинан цукунсса кумаг буван багьлай бурив, ци тагьар дурив ххал дуллай зий бивкIунни министртал.
Ванал кIицI лавгунни, Дагъусттаннал БакIчи Сергей Меликовлул ва масъалалух тIабиаьт оьдиркIсса та кьининия шийннай хъуннасса къулагъас душиву, зараллу бивсса цавагу идара, цаягу инсан кумаг къабувну лях къаличIаншиврул. КIулшивуртту дулаврил ва элмулул министр ЯхIия Бучаев ивунни яла хъуними зараллу бивсса шанма школалийн ва мукьва садикрайн. Ялагу зараллу бивну бур мяйва школалийн. Вай учреждениярттай щаллуну ремонт дувансса хIукму бувунни. Юстициялул министерствалул вакилтурал Буйнакск шагьрулул ва Буйнакскаллал райондалул судру бусса къатри, мукунна ЗАГС-рал къатри ци тагьарданий дурив ххал дунни, вайгу, цIу дуккан дуван багьлаймур дакьин дурну, лази-лакьи дувансса хIукму бунни.
Минэнерголул баян бунни ттукIрал ва газрал сетирдал микIирал чявхъагъарал дурхIушиву, зараллу хьуну бушиву так трансформатордал подстанциярттал магъурдин ва ца-кIива изоляторданун, вай муркIа дурсса магъивгу, изолятордугу бакьин буван хIукму бунни. Транспортрал ва ххуллурдал хозяйствалул министр Жамбулат Салавовлул зия хьусса ххуллурдугу бакьин буван бакIрайнласу бунни, агьалинан арцуйнусса ка-кумаггу бунни. Промышленностьрал ва машлул министр Низам Халиловлулгу завод «ЗАО Мушарака» ООО-лун ва цаймигу предприятиярттан кумаг бувантIишиву баян бунни. Вайми министрталгу цайнма-цайнма багьайсса учреждениярттал тагьарданул хъирив бавцIуну бур, аьркинсса ка-кумаг буван хIадурну бур.
