Июнь зурул 15-нний, Аьрасатнал кьинилун хасну, МахIач­къалалив «Аьрасат – ттул тарихри» тIисса музейраву хьунни «Я люблю Россию: Россия – это мы» тIисса форум.

[dropcap]Ф[/dropcap]орумрал лагрулий Аьрасатнал обществалун хас бувсса масъалартту ххал бигьлагьи­сса мероприятияртту хьунни Да­гъусттаннал гуманитар институтраву.
Форумрал пленарный заседанияртту дайдирхьуна тарихрал музейраву. Шикку гьуртту хьунни ДР-лул миллатрал политикалул ва диннал иширттал министр Энрик Муслимов, ДР-лул Халкьуннал Мажлисрал комитетрал председатель Пируттин Раджабов, Да­гъусттаннал гуманитар институтрал ректор Нухкьади Бахмудкьадиев, хI­укуматрал властьрал, элмий­сса интеллигенциялул, диндалул ишккаккултрал чулухасса вакилтал ва республикалул вузирдал студентътал.

Гьурттучитал барча буллалисса ва форумрал даву дайдихьлахьисса ихтилат бунни Энрик Муслимовлул.
«Гьарицагу миллатрал ду­ссар цинна хасъсса культура, аьдат-эбадатру ва маз. Дагъус­ттангу хъанай бур Аьрасатнал ца бутIану. Жула билаятрал дуллуну дур жухьхьунна щиячIав хъар бакъа хьхьичIунмай хъанансса ва ялапар хьунсса ихтиярду. Вихну ура жулва билаят ппив-ххив бан кьаст лархIуминнаща цичIав бан къабюхъантIишиврийн. Аьра­сатнал дяъви къабайбивхьуссар, Аьрасатнал му ххувшаву ларсун бацIан бантIиссар», – увкунни министрнал.

Аьрасатнал тарих щихачIав къалавхьхьусса ва караматсса бушивриясса ихтилат бунни Нухкьади Бахмудкьадиевлул.
«Аьрасатнал агьалинал цашиврийн бувну, бувчIлай бур жула аьрщи ва Ватан дуру­ччаву жула хъунмур мурад хъанахъишиву. ХIакьину жула бакIрачIан цуксса захIматсса кьинирду дучIарчангу, умуд бур агьалинал ми чIуннугу лайкьну лахъантIишиврийнсса», – увкунни ректорнал.

Форумрал лагрулий оьрчIал хореографиярттал ансамбльлал ккаккан дунни патриот балайрдал концерт. Музейрал фойеравугу тIиртIуну дия миллатир­ттал культуралул, багьу-бизулул выставка.