Аьрасатнал кьини «На – аьрасатлувра» акциялул лагрулий Республикалул БакIчинал сипталийну хасъсса аьралий операциялий жанну дуллусса аьралитурал аьпа абад буллалисса ултти лархъунни.
Хъусращиял шяраваллил школалул чIирайнгу лархъунни ЦIимпаев Аьли Муртазааьлил арснал аьпа абад буллалисса мармарчарил ула. Украиннаву хасъсса аьралий операция байбивхьусса гьантрайва прапорщик ЦIимпаев уссия ЛНР-лул ва ДНР-лул аьрщарай аьраличунал бурж биттур буллай. Сладкое цIанилусса пунктрачIа щаву дирну ванал виричушиврий жан дуллуссар.
Увну ур Аьли ЦIимпаев августрал 4-нний 1971 шинал Хъусращиял шяраву Муртазааьлил ва Бикал кулпатраву. Армиягу лавхъун, ташулулгу хьуну, ялапар хъанай уссия Аьрасатнаву. Бур кулпат ва душ.
Вай гьантрай Аьли аьпалул хьуну мукьцIал буллуссар. Аьпа абад буллалисса мероприятиялий гьуртту хьун ва дуклай ивкIсса шяраваллил школалийн бувкIуна Ккуллал райондалул администрациялул бакIчи Шамил Рамазанов, личIи-личIисса идарарттал зузалт, гъан-маччами, жямат ва дуклаки оьрчIру. Шикку махъру лавхъуна Шамил Рамазановлул, учительтурал, гъанчувнал, дакIнийн бивчуна Аьлил оьрмулувасса лахIзарду.
Жяматрал ва кIулцириннал дакIний Аьли личIантIиссар дакI кьянкьасса аьраличуну, халкьуннал тархъаншиврухлу виричушиврий жан дуллусса аьрасатлувну.
