Бакуйсса жула Лакрал ккурандалул дурунни Азирбижаннал ца яла цIа дуркма спортсмен, Азирбижан Республикалул ххюйла чемпион Сулайман Набиевлул юбилей.
Сулайман увссар Бакуй 1943 шинал, ванал нину-ппу, ПатIимат ва Билал Набиевхъул, Гьуйятуссар.
Цаппара шиннардил хьхьичI на чивчуссия ва кулпатрая. Кулпат бия чIявусса оьрчI-бакI бусса – 4 уссу ва 1 ссу, кулпат бия хIал бавкьусса, хIалимсса. Нину-ппу сагъну бакъар ччянияцIава, цуксса хIайпнугу, дунияллия лавгунни 2 уссугу – хъунама Кьасим ва чIивима Наби. Оьрч1ан цинявннан кIулссия лакку маз. Ххирар миннан цала чIиримур Ватан – Дагъусттан. Билаллул ва ПатIиматлул оьрчI-бакI лайкьсса бур цала нитти-буттал цIардан.
1996 шиная дукIумур шинайннин Сулайман зий уссия Азирбижаннал ттизаманнул пятиборьелул президентну. Му чIумалнин тIурча, чIярусса дия ххувшавурттугу, бивхьусса захIматгу. Пятиборьелул спортрахун машхул хъанан ивкIссар 1958 шиная шийнай. Сулайманнул ларсъссар Республикалул бяст-ччаллай чемпионнал цIарду – жагьилтуралгу, бугьараминналгу дянив (1959 шинал), СССР-данул жагьилтурал дянив (1961ш). 1961 шиная 1965 шинайннин Сулайман ивк1ссар СССР-данул цачIундур командалул членну.
Сулайман ххув хьуссар СССР-данул Халкьуннал спартакиадалий 1963 шинал, гьурттуну ивкIссар СССР-данул командалувух Токиолий 1964 шинал хьусса Олимпиадалий. Лайкь хьуссар СССР-данул Спортрал мастернал цIанин.
1965 шинал къуртал бувссар Азирбижаннал паччахIлугърал Физкультуралул институт.
Сулайман 40 шинал мутталий зий ивкIссар Азирбижаннал паччахIлугърал Экономикалул университетрал спортрал ва граждан обороналул кафедралул хъунаману.
Жула ватанлув ва ванал гьалмахтал СССР-данул Халкьуннал 3-мур спартакиадалий хьуссар ттизаманнул пятиборьелул чемпионтал. Спартакиада тIитIаврий Азирбижаннал ттугъ лавсун най ивкIссар Сулайман Набиев. Таний Сулайман ивкIссар командалуву яла жагьилма спортсмен – ванан диркIссар дурагу 20 шин. Ванал хIадур бувссар чIявусса спортсментал.
КIанттул кказитирттай цимилагу бивщуну бивкIссар ванал хьхьичIуннайшивурттая, ванал хIадур бувсса жагьилсса спортсментурая. Сулайманнун дуллуссар чIярусса наградарттугу, миннувух дур мукунна медиа наградартту «Азербайжан байрагъы» (Азирбижаннал ттугъ), «Тарагги» (хьхьичIуннайшиву) тIисса медаллу ва цаймигу.
Вана цIанагу, 80 шинал юбилейрацIун ванан дуллунни Азирбижаннал жагьилтурал ва спортрал министр Фарид Гаибовлул къулбас дурсса барча аврил адрес.
Азирбижаннайсса Лакрал ккурандалулгу барча унни чемпион.
Ванал ххаллилну тарбия бунни цала ца бакъа бакъасса душ. ЦIана ва зий бур Азирбижаннал Централ Банкрал департаментрал хъунмурну.
СалихIат Аьлиева,
ш.Баку
