Аьрасатнал кьинилул байран хIисаврайсса шадлугъ хьунни 1-мур ЦIувкIуллал шяраваллил библиотекалуву. Ва кьини шивун бавтIун бия шяраваллил агьлугу, райондалийсса библиотекардал зузалтгу ЦБС-лул директор ПатIимат ХIажиаьлиева бакIчину.
ЦIувкIуллал библиотекалул хъунмур Зульфия Кьурбанаьлиевал бувсунни райондалул библиотекарттал зузалтрал-семинар ЦIувкIрав танийра дувансса ният диркIшиву, шяраву цайми мероприятияртту духьувкун, миннул хьхьичIун къабагьну, гьамин ва байрандалул кьини дуван бавцIушиву. Ванил бувсунни ХIажиаьлиева ПатIиматлул бавтIцири барча буллалисса ихтилатраву Аьрасат бюхттулсса тарихгу, цIа-кьинигу дусса билаят бушиву кIицI лавгшиву, хIакьинусса кьинигу билаятрал мурадру буручлай вирттал кьянкьану бавцIуну бушиву.
Сайки щалва оьрму ЦIувкIуллал оьрчIан оьрус маз ва литература лахьхьин дуллай гьан бувсса, Дагъусттаннал лайкь хьусса учитель Ххадижат Ссаламовал бувсунни ЦIувкIуллал шярава Хъундяъвилийн лавгшиву 206 инсан, бувсунни бусалардавун агьсса КIийла Виричу АхIмад-Хан Султаннуя, дунияллийх цIувкIуллал пагьламантурал цIа дуккан дурсса артистътурая. Шяраваллил тарихрая, культуралия, магьирлугърая, аьдатирттая бувсунни школалул учительтуралгу. Райондалул «ЧаннацIуку» кказитрал корреспондент Арсен Аьбдуллаевлул балжину бувсунни Аьрасатнал кьинилул байрандалул тарихрая. Семинар-совещаниялул программалуву дия викторинагу. «Ххарину бура ччянира дуван дакIнийсса семинар-совещание гьамин Аьрасатнал байрандалул кьини чIявусса агьлугу бавтIун дуван бюхъаврия. Ва жулла билаятрал, аьрщарал, ужагърал, Ватандалул кьинир.
Жулла цамур Ватан дакъассар, цамур ужагъ бакъассар. Жулла Ватандалияр язиссагу, ххуйссагу цичIар дикIан къабюхъайссар», – увкунни «Илчилул» корреспондентнахь Зульфия Кьурбанаьлиевал.
