Экзаменная
Июнь зурул 5-нний ЦIуссалакрал райондалул выпускниктурал дуллунни тарихрал ва физикалул дарсирдал Цасса паччахIлугърал экзамен.
Выпускниктал ЕГЭ-рду дуллай бур ЦIуссачIурттащиял ва ЦIуссалакрал школарттай тIивтIусса пунктирдай. Вузравун буххансса ихтияр дур тарихрал дарсирал экзамендалул 32 балл лавсъсса оьрчIахь. Физикалул дарсирал ЕГЭ-рдал ласун ккаккан бувну бур 36 балл. Тарихрал ва физикалул дарсирдал ЕГЭ-рдал хIасиллу кIул хьунтIиссар июнь зурул 21-нния тийннай. Обществознаниялулмур экзамен дайдихьлай дур июнь зурул 8-нний.
Чапаевкаллал 2-мур школалия
ЦIуссалакрал Чапаевкаллал 2-мур школалий 3-мур классраву дуклакисса Къаранов Шамиллул 3-мур кIану бувгьунни Дагъусттаннал кIулшивурттал даража хьхьичIунмай баврил институтраву хьусса «Первоцвет – 2023» тIисса байбихьулул классирттал дуклаки оьрчIал ахттаршиннардал конкурсрал финалданий. Конкурсрай гьуртту хьусса оьрчIал творчествалул проектру дия буттал улклул тIабиаьт, аьдат-эбадатру лахьхьаву ва дуруччаву мурадрайсса ва хIакьинусса кьини яла цIюрувкьуми масъалартту ахттар буллалисса. Шамиллул проект дия «Что такое добро?» тIисса темалун хас дурсса. ЧIава ахттарчитурал конкурсрай хьхьичIунсса кIану бувгьусса оьрчI школалийгу хьхьичIунну дуклай ур. Шамил ххирасса ур учительтуран ва архIал дуклакиминнан.
[dropcap]Ч[/dropcap]апаевкаллал 2-мур школалул 3-мур классрал дуклаки оьрчI Оьмаров Рабаданнулгу бувгьунни «Первоцвет – 2023» тIисса чIава ахттарчитурал конкурсрай «Моя малая Родина» тIимур номинациялий 1-мур кIану. Рабадан школалийгу хьхьичIунну дуклакисса оьрчI ур. Ванан хъинну ххирар поэзия, чялишну гьуртту шай школалийсса цинярдагу мероприятиярттавух. Цувагу ур машгьурсса футболист хьунсса хияллай.
ОьрчIангу ххуйсса суратру рищун кIулссар
ЦIуссалакрал райондалиясса Сиражуттин Хайдакьовлул 2-мур кIану бувгьунни «Глазами детей» тIисса Республикалул суратирттал конкурсрай. Ванил агьаммур мурад бия творчествалул гьунар бусса оьрчIру аьлтту баву ва машгьур баву. Региондалийсса суратирттал конкурсрай гьуртту хьунни республикалул кIулшивуртту дулаврил идарарттай дуклакисса 12-18 шиннардил оьрчIру.
Конкурсрал хIасиллайн бувну, Аьрасатнал Виричу Мутай Исяевлул цIанийсса ЦIуссалакрал гимназиялул 8-мур классрал дуклаки оьрчI Сиражуттин Хайдакьовлул бувгьунни 2-мур кIану. ЧIа учинну Сиражуттиннун гихуннайсса конкурсирттайгу тIайлабацIуртту.
