ЦIуссалакрал администрациялучIасса Балугъравун къабивминнал иширтталсса буллалисса ва миннал ихтиярду дуручлачисса комиссиялул вакилтал бивунни райондалул школарттайн.
Вайннавух бия комиссиялул хьхьичIунсса пишакар Лиана МаматIиева, райондалул азарханалул нарколог-психиатр Шабика Аьлиханова, балугъравун къабивминнал иширтталсса байсса подразделениялул хъунама инспектор Тимур Шавлукьов ва мура подразделениялул инспектор Раджаб Хайбулаев, Агьали давурттал дузал байсса центрданул пишакар Минажат Манапова, уголов розыскрал отделданул оперуполномоченныйтал Рауль Султанов ва Сулайман ХIаммадов. Вай школарттайн бияврил мурад бия балугъравун къабивми экстремизмалул ва терроризмалул иширттавун кIункIу хьун, закондалуцIун къадаркьусса акциярттавух гьуртту хьун къабитаву, миннал дянив гуж-къия давриясса информацияртту ппив хьун къабитаву.
Дуклаки оьрчIащал бунни къалиян учавриясса, хIан хIачIавриясса, мукунма наркотикирттаясса нигьачIавриясса ихтилатру. Бувсунни вай иширттал хIакъиравусса федерал законная. Комиссиялул пишакарнал бувчIин бунни балугъравун къабивми ссят 22.00 хьуния махъ хъуними архIал бакъана жяматийсса кIанттурдай бикIан къабучIишиву. ОьрчIахь бувсунни закон къакIулшиврул уголов ва административ жавабрая мурахас къабайшивугу.
