МахIаммадлул арс Ися МахIаммадов увну ур 1937-кусса шинал ЦIущуллал шяраву. Дуклай ивкIун ур буттал шяраву, 2-мур ЦIувкIрав, Щурагь педучилищалуву. 1966-ку шинал къуртал бувну бур Дагъусттаннал паччахIлугърал университетрал филологиялул факультет. Муния махъ зий ивкIун ур учительну Рутуллал ва Ккуллал районнай, ОНО-рал хъунаману, ЧIяйннал дянивмур даражалул школалул директорну.

Ися МахIаммадовлул тамансса шеърирду, хаварду бивщуссар лакку мазрай буккайсса кказитирттай, журналлай, итабавкьуссар цайминнащал цачIусса «Чирахъ» ва «ПархтIутIи» тIисса жужру. Бувкссар цалалусса «Хъиншиврул чани» (1993 ш.) тIисса назмурдал лу, оьрч1ансса хавардал «Салман ва Султан» (1981ш.) тIисса жуж.

ХХУЙШИВУ

Бургила, ххуйшиву
Жула аьрщарал:
ХьхьичI – лачIал хьхьирирду,
Тийнмай – хIавирду.

Халичарттал арду,
Бюхттул зунттурду,
Зунттурдал хъазамрай —
Щархъурду-кюртти.

Арцу кунна, пар тIий
Нехру-накьичру,
Бярду-бирлиянтру
Бургъихь пиш-пиш тIий.

Щаращив-ттиркьюкьив,
Хъяй, балай тIийнма,
Ялувгу някI сунттул
Муданнасса ххют.

Цал ттигу хIисаврай
Бурги лагмава:
Ххуйшиврул карамат
Дакъарив аьрщи.

Нани, къаританну
Ва къашавай хьун,
Къалещаншиврул нур
Ванил ххуйшиврул.

ШИККУРА УВССА НА

На Лакку улклуцIун
ЛавчIунгу ура,
Мах лачIайсса кунна
МакьнатIисрацIун.

Шиккура на увсса,
Хъунагу хьусса,
Зунттал тIабиаьтрал
Сасангу увсса.

Шиккур ттун лавхьхьусса
Ттула ниттил маз –
Аьзизсса миллатрал
Аьмсса ххазина.

Шиккур ттун лявкъусса
Цалчинма дусгу,
Шиччар шагу лавсъсса
Оьрмулул ххуллийн.

ХьхьичIва-хьхьичIсса шеъри
Шиккур чивчусса,
Шиккур лакку душних
Эшкьигу хьусса.

Шиккур ттун лавхьхьусса
ЗахIматгу буллан,
Шиккур ххира хьусса
Лакку аьрщигу.

Шиккувар нанисса,
Ттул оьрму ттигу,
Шиккувар ттул оьрму
БацIантIиссагу…

ГЪАЗИ – ГЪУМУЧИ

Лакку ватандалул аьзизсса кюруй,
Муданма сийлийсса Гъази-Гъумучий.
Цал ттигу жу виха балай учинну,
Му вил гьайкалданий чигу-чичинну.

Тай хьхьичIазаманнул чапхунчитуран
Ккаккан бувссар ина вила яхI, кьуват.
Ци баларду ялун биллай бивкIнугу,
Кьюкьингу къабивтссар Буттахъал улча.

Вия байбивхьуссар миллатрал тарих,
Аьлимтурал мина вийнни учайсса.
Вил тарихрал жужрай цIусса хха чичин,
Мусагу левххуссар бюхттулсса ссавнийн.

Лакку ватандалул аьзизсса кюруй,
Муданма сийлийсса Гъази-Гъумучий,
Цал ттигу жу виха балай учинну,
Му вил гьайкалданий чигу-чичинну.

ТТУЛА ДУШНИЛ АЬПАЛУН

ЧIун къадирна левщунна
Ина, жул мусил цIукуй,
Кьадиртун жул дакIурдий
Хъин къашайсса щавугу.

Вила аьзиз кулпатран
БикIайвав ина баргъну,
Утти щилликьай вихлу
Ужагъ гъили бантIисса?

Ина дай калимарттал
Шад дайссия жул дакIру,
Утти вил мазрай жущал
Щилли бантIисса гъалгъа?

Ина мудан бацIайвав
Кумаг аьркиннал чIарав.
Тти ина ххал къахъанай
МахIрумну ливчIсса чIявур.

Вин кIула ухнал ххуллу,
КIула ххувнал намусгу,
Ина лявхъуну бияв
Барачатрал тIимуну.

Тти цири жун кIа баргъгу,
Цири хьхьувайсса барзгу,
Жун муданма левщукун
Вия най бивкIсса чани.
20.01.2021.ш.

ЦIУНИЛГУ ЖАГЬИЛ ХЬУННИ

ЦIунилгу жагьил хьунни
Аьзиз Лакку билаят:
Аьрщи — щюлли янналув,
Мурхьру — тIутIал балгуну.

Укку, ттул дус, кьатIувай,
Ухьурча бизар хъанай.
Цанна ина щяивкIсса
Шава ва шадсса кьини?

Укку, ябитаннуча
ПпабакIух, пуркIу тIисса.
Тамаша буваннуча
Барзуй, авлий бувккусса.

ВичIи дишинну жура
ХIукъулул щурщулухгу,
Мурхьирдавунгу бувххун,
Къяртращал балай тIисса.

Ачу, ягу, гьаннуча,
Яттикъушлий хьхьу рутан.
Къазана шайрив ххал дан
Жагьил чIун жучIаннагу.

КIУЛ АКЪАССА
САЛЛАТIНАЛ ГЬАТТАЙ

На вищал акъассияв
Та дяъвилул цIараву.
Аьй мадара ина ттуй,
Ияв таний чIивисса.

Утти тIурча, учIара
Мудан на вил гьаттачIан,
Ттул оьрчIшиву дуручлай,
Оьрму харж бувсса саллатI.

УчIара ссалам лавсун
Лакрал щархъал гьан бувсса.
УчIара икрам буван
Щала Лакку кIанттухлу.

Дягъинттулгу вил гьаттай
Чан къашай тIутIал кацIру.
Вил чIарах нанитари
Ниттихъал лишай яру…

ХIакьину къакIулнугу
ХIакьсса къучагъ, вил цIа жун,
Вил гьунар буссар жуву
Абадлийсса балайну.

КIЮРХ

ЧIумул бидавлий бурттий,
Хьхьу дарчунни зунттава,
Зунзулчаннал нур риртун,
ЯтIул ларгунни някI ссав.

Кюрттараву лелуххант
Мурчал чантI учин бунни.
Утти гайннул балайлул
Щалла дара дурцIунни.

НеххацIухсса ттуруллив
ХIаллих даслан диркIунни.
Цуппалу ливчIсса цIуку
НякIсса ссавний левщунни.

Бургъил цалчинсса тIинтту
Лирккунни зунттал бакIай –
Къуплива тIутIи кунна,
Хъя кунни кIюрх аьрщарай.

* * *
На, ЦIущар ххал шайхту,
Ссалам булайссар,
Яла икрам байссар,
Архниятува.
Ттул оьрмулул багъгу,
Ттуйн бивтсса баргъгу,
Буттал шяравалур,
Мудан дакIнийсса.

* * *
ЧIивисса бунугу, цIа дурксса миллат,
На ина дакIнийну утту ишара.
Цайми халкьуннаву бавкьусса ттул лак,
Зущал ихтилатрай кIюрххил изара.

Ттул аьзизсса миллат – дакIнил музыкай,
Къуртал бан къашайсса язисса балай,
Цир ттун ххазинагу, пахру-ххарагу,
Бакъахьурча вил чIу гьар кьини баллай.

* * *
Мюрщи хъанай най дур
Лаккуйсса щархъив,
Щин чан хъанахъисса
Щаращив кунна.
ХIучI буххай дакIнивун
Гай ххал хьутари,
Ятин хьунссархха тIий
Лакку билаят.

* * *
ТIабиаьтрал карамат
Инсангур хъанахъисса,
Лавхьхьуну ухьурча га
Чани буллан цайминнан.

* * *
Мискиншиврул буруккин
Бунугу дакI кьуцIу тIий,
ЯхI бусса инсан тачIав
Чийн уккан къасисайссар.

* * *
Дуручлачу, инсан,
Гьар кьини аьрщи,
ОьрмулуцIа къахьун
Га чIун дияннин.

* * *
Зунттаву лакку аьрщи
Вил каруннах ялугьлай –
Ина – шагьрулул хьуну,
Пахрулул хъихъи ивтун.

* * *
Ччаву дякъин дитарча,
ЦIунил гъили къашайссар.
Багьну, урша гъагъарча,
Базлай базин къашайссар.

* * *
Дукра инкар къадурссар
На тачIав, ххуй къадирзун:
Ттун ккаркссар та дяъвилул
Мукьрагу ккашилсса шин.

* * *
Виричунал цаяра
ТачIав цIа къадувайссар,
Къадувайну тIий ганал
Чувшиву так цIа ласун.

* * *
Жува жунма талихI
ЧIа тIун бикIару,
ТалихI оьрму буна
Жунма буллусса.

* * *
Миллионну харж бувну,
Ина бувунни чIалъаь,
Утти нигьачIий ура
Гиву яхъанан ина.

* * *
Макьу даркьуну дикIай,
ТалихIрал бутIа ххишай,
ЧIаххул бухьурча хъинсса,
ДакIгу, мазгу тIайласса.

* * *
Бурандалун бару –
Бюхттулсса зунтту.
Оьбалалун бару –
Къучагъсса инсан.

* * *
Эшкьи-ччаврил буссар
Цила билаят,
Ххарисса асардал
Ххихху бивтнасса.

* * *
Ци байссар балайлулгу,
Цал учайхту, бивчIайсса,
Ци байссар щаращулгу
ЩилчIав щин къахIачIайсса.

2022 ш.
ш. Ваччи.