Ларгсса хамискьини «Дагестан» РИА-лий, «Кавказ подо мною» тIисса федерал медиапроектрая балжину бусласи­сса пресс-конференция хьунни. Ваний гьуртту хьунни Дагъусттаннал Информациялул ва печатьрал агентствалул хъунаманал хъиривчу Рустам Жалаков, проектрай каялувшиву дуллалисса Мария Дудко, Ираннавасса фуд-блогер Ромина Багери ва республикалул туризмалул министрнал хъиривмур Анна Безрукова.

Хъамаллурал бувсунни, личIи-личIисса билаятирттаясса блогертал Ккавкказуллал республикарттайн цивппа бивну, щаллагу дунияллухь Ккавкказуллал халкьуннал ляличIисса культуралия, аьдатирттая, тIабиаьтрая бусансса бушиву гьанумур мурад. Бувсунни вава мурадрай бившиву Къарачай-Чаргаснавун, Чачаннавун, Ингушетиянавун, Ухссавнил АьсатIиннавун. Гьаннай­сса, ххюра региондалий съёмкарду дурну къуртал дуршиву, Къабардин-Балкьар ва Дагъус­ттан ливчIшиву.
«Жун Ккавкказ бусса куццуй ккаккан буван ччай бур: хъамал ххирасса, авадансса культура ва аьдатру дусса бушиву», – увкунни Мария Дудкол. Проектрал лагрулий документал журалийсса арулла киносуратгу, кутIасса роликругу хIадур дувантIий бур. Миннул авторталгу кьатIаллил билаятирттаясса машгьурсса блогертал бикIантIий бур. Гьарца региондалун ца-ца киносурат хас дурну. Ромина Багерил, масалдаран, мукьва миллион подписчиктурал бусса бур. Дагъусттанная бусласисса видеороликгу, киносуратгу ванил подписчиктурал ххал дувантIий дур. Дагъусттаннал культуралия, аьдатирттая тIурча ванихь буслантIий ур МахIачкъалалийсса вузраву дуклакисса студент, блогер Амир АхIмадов.
Съёмкарду дикIантIий дур МахIачкъалалив, Буйнакскийл цIанийсса кIичIираву блогер бартбису щашлай, аьвзал заманнул Дарбантлив, Сулакьрал каньондалий ва цаймигу авурсса кIанттурдай. Анна Безруковал кIицI лавгунни, Да­гъусттаннал ва Ираннал хIала-гьурттушиврийсса арарду цIакь хъанахъисса ппурттуву, ва проектгу Ираннал халкьуннан Дагъусттаннал багьу-бизу, тIул-тIабиаьт усттарну ккаккан дувансса сант душиву, Ираннал ва Дагъусттаннал культуралуву ва занакьулушиндараву цалархьхьумур мадарасса душиву. Ромина Багерилгу чIурчIав дунни, цилвагу хасну Дагъусттан язи бугьаврил савав жулла регион цилламур дакIнингу гъансса душиврий.
«Жугу дакI дарцIуну буру зул проектрал Дагъусттаннал хIакьсса ххуйшиву ккаккан дувантIишиврий дунияллун», – увкунни Рустам Жалаковлул.

ПатIимат Рамазанова