Сентябрь зурул 1-нний цIусса дуккаврил шинал дайдихьу дуллалисса линейкарду хьунни ЦIуссалакрал райондалул 23 школалий. Гьашину школалийн бувкIунни 8 азаруннийн бивсса дуклаки оьрчIру, миннава 700 – цалчинмур классравун.
Аьдатравун багьсса куццуй, шадлугърал линейка дайдирхьунни Аьрасатнал гимнрахун ПаччахIлугърал ттугъ гьаз баврийну. Школардал директортурал ва бусравсса хъамаллурал барча бунни оьрчIру ва учительтал. ОьрчIал дурккунни школалухасса, учительтурахасса назмурду, увкунни балайрду.
Аьдатрайн бувну, цалчинмур классравун бувкIминнан дунни бахшишру: букварьду ва школалул кьай. 11-мур классравусса дуклаки оьрчIал карав бувцуну, 1-мур классравун бувкIсса чIивитIул бивщунни цалчинсса гюнгутIи.
КIулшивурттал кьинилун хас дурсса шадлугърал мажлисру хьунни цIуминалийсса школардайгу. Шиккусса школардайн гьашину гьантIиссар 3730 оьрчI, миннава 346 – цалчинмур классравун. Райондалул администрациялул вакилтурал барча дунни дуклаки оьрчIахь, учительтурахь ва нитти-буттахь цIусса дуккаврил шин.
Шушиннал школалий
Аьрасатнал Виричу Дмитрий Серковлул цIанийсса Шушиннал школалул оьрчIру ва учительтал барча бан бувкIун бия щаллусса делегация: Дагъусттаннал Мюхчаншиврул советрал секретарьнал хъиривчу Давуд Унчиев, Дагъусттаннал ХIукуматрал цIуссалак цIусса миналийн бизан баврил ва Аухуллал район цIудуккан даврил масъаларттаха зузисса управлениялул хъунама МахIаммад-ХIажи Айдиев, ЦIуссалакрал райондалул бакIчинал хъиривчу Арсен Гъазиев, Шушиннал шяраваллил бакIчи Камил ХIажиев ва хасъсса аьралий операциялул гьурттучитал.
Учительтурал коллектив ва дуклаки оьрчIру мукунма барча бунни школалул директор Шакират Абакаровал. Ванил барчаллагь увкунни дуккаврил ва школалул цинявгу иширттал чIарав бацIлацIисса нитти-буттал комитетрахь.
– КIулшивурттал циняв ххуллурду тIитIайссар. ХIакьину жула билаятрай зу куртIсса кIулшивуртту ласун циняв шартIру дузал дуллай бур. Зуйн, зул кIулшивурттайн ва бюхъу-бажарданийн хъар хъанахъиссар жула бучIантIимур. ХIарачат бувара, ххуйсса кIулшивурттугу ларсун, зула школалул, шяраваллил цIа-кьини бюхттул дан, – увкунни Давуд Унчиевлул.
Арсен Гъазиевлул барчаллагь увкунни ялун нанисса ник тарбия даврил цIаний хъунмасса захIмат бихьлахьисса учительтурахь, чIа увкунни цIуллушиву, пишалул ххуллий хьхьичIуннайшивуртту ва ссавур.
Хасъсса аьралий операциялул гьурттучитурал кIицI лавгунни Ватан дуруччаву ва кIулшивуртту ласаву гьарица инсаннал агьаммур бурж бушиву. Ихтилатру къуртал хьуну махъ дуклаки оьрчIал ккаккан дунни хъамаллуран дялахърулул программа. Яла бивщунни цIусса дуккаврил шин дайдихьлахьишиву баян буллалисса цалчинсса гюнгутIи. Шадлугърал бутIа къуртал хьуну махъ цинявннал дирхьунни тIутIив школалул хIаятравусса Дмитрий Серковлул гьайкалдануцI.
ЦIуссаккуллал 1-мур школалий
ЦIуссаккуллал 1-мур школалий КIулшивурттал кьини кIилийнусса байран хьунни. ЦIусса дуккаврил шин щикку дайдирхьунни гьануцIакул дакьин дурну, цIудуккан дурсса къатраву. Школалул къатри дакьин дуллай буссия «Молодежь и дети» нацпроектравун духлахисса «Все лучшее детям» тIисса федерал проектрал лагрулий.
Махъсса 4-5 зурул дянив шикку даххана дунни циняв конструкциярду, цIу дуккан дунни магъи, поллу, чIавахьулттив ва нузру. Мукунна цIу дуккан дунни цIарая мюхчан байсса конструкциярду. Щала лажин чул ва школалул чIаравсса кIанттурду баххана хьунни, чIалачIин ххуй хьунни.
Сентябрьданул 1-сса кьини, шадлугърал даражалий ятIул лентагу кьувкьуну, дуклаки оьрчIру, учительтал ва нину-ппу цIу дуккан дурсса къатравун бувххунни. КIулшивурттал кьини барча дан шиккун бувкIунни ЦIуссалакрал райондалул бакIчинал хъиривчу Султан ХIамзатов, райондалул КIулшивуртту дулаврил управлениялул хъунмур Светлана Кудаева ва мунил хъиривчу Расул Атлангериев, ишбажаранчи Исмяил Гапуев, хасъсса аьралий операциялул гьурттучи Роза МахIаммадова, шяраваллил администрациялул вакилтал.
Школалул директор Рукьият Султановал барчаллагь увкунни ЦIуссалакрал райондалул бакIчи МаматIи ХIамзатовлухь ва «Вымпел» тIисса подрядный организациялул зузалтрахь дуклаки оьрчIан дурсса бахшишрахлу, мукунма школалул муданасса спонсор Исмяил Гапуевлухь столовайлунсса мебель ласун кумаг бувну тIий.
Цала ихтилатраву Султан ХIамзатовлулгу барчаллагь увкунни школалул ремонт чIумуй къуртал дан хIарачат бувсса цинявннахь.
Шадлугърал мажлис чIюллу бунни Дагъусттаннал культуралул лайкь хьусса зузала Сара ХIажиевал балайрдал ва дуклаки оьрчIал хIадур дурсса программалул.
Гьамияхь
КIулшивурттал кьинилун хас дурсса линейка хьунни Гьамиящиял школалийгу. Дуклаки оьрчIахь ва учительтурахь цIусса дуккаврил шин барча дан увкIун ия ЦIуссалакрал райондалул бакIчинал хъиривчу Амир Султанов ва хасъсса аьралий операциялул гьурттучи Жавраил Султанов.
«ХIадур ува оьрчI школалийн»
ЦIусса дуккаврил шин дайдишин хьхьичI ЦIуссалакрал райондалий хьунни «ХIадур ува оьрчI школалийн» тIисса щалагу билаятрай аьдатравун дагьсса акция.
Акциялуву хьхьичIа-хьхьичI гьуртту хьунни райондалул бакIчи МаматIи ХIамзатов. Гьашину ЦIуссалакрал райондалий акциялул лагрулий 70-нния ливчусса кулпатирттан кумаг бунни оьрчIру школалийн хIадур бан. Миннавух бур чIявусса оьрчIру бусса, ахIвал кIюласса 40 кулпат ва хасъсса аьралий операциялий жанну дуллуминнал кулпатру. Вай цинявннан кумаг бунни школалул форма, рюкзакру ва цаймигу школалий аьркинсса кьай ласун. Хасъсса аьралий операциялий жанну дуллуминнал 30 кулпатран (оьрчIру цалчинмур классравун нанисса) кумаг бунни Дагъусттаннал ХIукуматрал цIуссалак цIусса миналийн бизан баврил ва Аухуллал район цIу дуккан даврил масъаларттаха зузисса управлениялул хъунама МахIаммад-ХIажи Айдиевлул. Акциялуву гьуртту хьунни Халкьуннал Мажлисрал Законодательствалул комитетрал председатель Артур Исрапиловгу. ОьрчIру школалийн хIадур бан кумагран ванал дуллунни 100 азарда къуруш. Акциялуву мукунма гьуртту хьунни райондалул администрациялул, ОМВД-лул, «Защитники Отечества» тIисса ихIсандалул фондрал вакилтал, «Цалчинминнал Суккушиндарал» активистътал.
ХIадур бувссар
Андриана Аьбдуллаевал
