Гьарца шинал майрал 27-нний кIицI лагайсса Библиотекарттал кьинилун хасъсса «Есть храм у книг – библиотека» тIисса цIанилусса шадлугъ хьунни Гъумук Культуралул центрданий. Ва сакин дурну дия ЦБС-рал директор Мариян Аьшаевал.
Шадлугъ дачин дурну ия Культуралул центрданул зузала АьлихIажи Щамхалов. Шадлугърайн оьвкуну бия библиотекалул даврил ветерантурайн – ПатIимат МахIаммадовайн, Кяъват Дандамаевайн, Саида Макьаевайн ва райондалул библиотекарттал зузалтрайн.
Шадлугърал дайдихьу дуллай, Мариян Аьшаевал бавтIминнахь барча дуруна пишакарсса байран – щалвагу Аьрасатнаву кIицI лагайсса Библиотекарттал кьини.
– Библиотекартту – ми инсаниятрал цимирагу аьсрулий цачIун дуллай диркIсса аькьилшиврул луртанну ядуллалисса кIанур. Ми цивппагу аьркинссар гьарцагу инсаннан, ци сянатрал, ци касмулул унугу ми аьркинссар цинярдагу никирттан.
Библиотекарь – му ляличIисса пишари, инсантуран яла агьаммур – кIулшиву ларсун нанисса. НахIакьдан бакъар учайсса: «Библиотекарь – му пиша бакъар, му дакIнил хIалли» куну…
ДакIнийхтунусса барчаллагь тIий бура, ххирасса дустал, ялун нанисса ник тарбия давриву, жяматиймур оьрмулуву зу буллалисса хъунмасса захIматрахлу.
ЧIа тIий бура зун цIакьсса цIуллу-сагъшиву, зун-занансса гъира-шавкь, талихI. КIулшивурттал чIалъаь цIу-цIусса буккултрал буцIиннав. Луттирдал фондгу цалнияр цал авадан хъананнав, – увкуна Марияннул.
Гихунмай ихтилатру бувна ва бусравсса пишалул ветерантуралгу. Ихтилатирттал лях-карах балайрду увкуна Шамсият Какваевал, АьлихIажи Щамхаловлул, Мариян Жамалуттиновал ва Рукьижат МахIаммадовал.
Бадрижамал Аьлиева
