Т. Мурадовлул цIанийсса Дагъусттаннал паччахIлугърал филармониялул Гъинттулмур площадкалий «Ночь кино» акциялул лагрулий Аьрасатнал шанна художественный фильм ккаккан дунни. Вай дия щалвавагу кулпат лагма лавгун бурган шайсса журалул.
Бадрижамал Аьлиева
Кинорал хьхьу тIиртIуна ларгсса шинал жулва билаятрал кинотеатрдаву хъунмасса тIайлабацIулущал цил премьера хьусса ва гихуннай оьрмулул мюрщиминнан ва хъуниминнан ххира хьусса «Чебурашка» фильмрал. Ва хъанахъиссар, киноиндустриялуву ишласса мукъурттийну учин, Аьрасатнал прокатраву яла кассовыймур фильм.
Ванияр махъ ккаккан дурна «Вызов» тIисса фильм. Ванивусса ца бутIа лавсъссар МКС-рал бортрай, Аьрщарая 400 километралул архшиврийсса манзилданий.
Хасну ванил съемкарду даншиврул орбиталийн тарихраву цалчин лавгссар киноэкипаж: актриса Юлия Пересильд, режиссер Клим Шипенко ва корабльданул командир Антон Шкаплеров.
Ва хьхьуну ккаккан дурсса шамилчинсса фильм дия «Праведник» тIисса. Ванивусса сюжет сакин дурну дур Буттал КIанттул цIанийсса Хъун дяъвилул чIумал мяйжаннугу хьусса ишру гьанулун лавсун.
