Ххувшаврил 80 шинал байрандалун хас дурсса мероприятиярттал лагрулий Ц|уссалакрал райондалийсса «Аьпалул багъраву» шадлугърал даражалий паччахIлугърал наградартту дуллунни хасъсса аьралий операциялул гьурттучитуран.
ЦIуссалакрал райондалул бакIчи МаматIи ХIамзатовлул «За отвагу» орден дуллунни ЦIуссалакрал шяравасса Таймураз Рамазановлун.
2023 шинал Таймураз, хушрай контрактгу чирчуну, увххун ур «Каспий» тIисса Дагъусттаннал Цалчинсса хушрайчитурал батальондалувун. Донецкаллал Халкьу­ннал Республикалийсса Бахмутовский райондалий аьралий бурж бартбигьлай, ванал ккаккан бувну бур цува кьянкьасса, сивсусса ва вихшала дишин бучIисса къучагъ ушиву. Цала оьрмулун нигьачIаву дунугу, цимилгу лавгун ур щавурду дирсса гьалмахтал госпитальлайн биян бан. Ца ппурттуву Таймуразлул цIарал ххурххуппалува уккан увну ур кIусса щаву дирсса гьалмахчу.
«Каспий» батальондалувун ухханнин Таймураз уссия шяраваллил хозяйствалухагу зий, ишбажаранчишивугу дуллай.
Вара кьини «Аьпалул багъраву» Суворовлул медаль дуллунни хасъсса аьралий операциялул гьурттучи ХIажиаьбдуллагь ХIабиевлун. Аьраличунан медаль дулун увкIун ия ДР-лул Законодательствалул, закондалул, паччахIлугърал строительствалул, кIанттул цила каялувшиндарал ва регламентрал комитетрал председатель Артур Исрапилов.
Ватандалийн кьини дурксса чIумал ХIажиаьбдуллагь цува рязину лавгун ур СВО-лий гьур­тту хьун.
Увну ур ХIажиаьбдуллагь 1985 шинал ЦIуссалакрал шяраву. Школагу къуртал бувну, Хабаровскаллал крайрайсса Комсомольск-на-Амуре шагьрулийсса Муххал хху­ллул аьралуннаву къуллугъ буллай ивкIун ур.
Имара Саидова