Дагъусттаннал вице-премьер Ризван ГъазимахIаммадов бакIчисса делегациялувух ДР-лул шяраваллил хозяйствалул ва бакIлахъиялул министр Шамил Рамазанов гьуртту хьунни Беларусьнал хъуншагьру Минскалий хьусса кIива чулухаллил комиссиялул 4-мур заседаниялий.

Беларусьнал чулуха заседание дачин дурну бия Беларусь Республикалул Муштари обществарттал правлениялул председатель Инесса Короткевич.
Муний цIакь дурну дур жула агросекторданун агьамсса кьутIирду. Экспорт гьарза шаву: кIира шинал мутталий Дагъусттанная Беларусьнавун даххайсса хъус иширайну кIилий гьарза хьуну дур. Гьарза дуллай бур ппалул экспорт, ларгмур шинал тIайла дурккун диркIссар 300 тонна ппалул 18,5 млн къурушрансса.

КьутIи чирчуну дур хIала-гьурттуну зузаврил хIакъираву янна (текстиль) дувайсса «КАМВОЛЬ» ОАО-лущал, ванил дайссар марцIну ппалул ва дачIи ппал хIаласса янна.
Мукунна гьарза дуллай бур гьивчул, ппиринжрал ва Дагъусттаннал ахъулссаннул сокрал экспорт.

КьутIи чирчуну дур цачIусса предприятие дузал даврил хIакъираву, мунил бувантIий бур 530 млн къурушрансса теплицардал комплекс.
Мукунма ххал бивгьуну бур Дагъусттаннай МТЗ-лул дилертурал центр тIитIаврил хIакъиравусса масъалагу, жула аграрийтал хъинсса техникалул щаллу баву мурадрай.
«Жу зий буру Беларусьнал хъус жучIара, жуламур Беларусьнаву машай дуккан дуллалавриха ва республикалий зузи кIанттурду гьарза бавриха», – увкунни Шамил Рамазановлул.

ХI. Аьдилов