Дагъусттаннай Аьрасатнал халкьуннал цашиврул шинал лагрулий хьунни «Две мечети.Сильные духом» тIисса ультрамарафон. Ххюя атлет-любитель 170 километралийх МахIачкъалалия Джума мизитрачIату Грознайлийн, «Сердце Чечни» мизитрачIан левчуну бувкIунни шану къалавхъун.

Ухссавнил Ккавкказуллал кIива рувхIанийсса центр цачIун буллалисса укунсса марафон цалчин хьуссия ряхра шинал хьхьичI. Ва гьашинугу тикрал дунни Дагъусттаннал бакIчинал администрациялул ва ХIукуматрал (Дусшиврул къатта), Чачаннал Физкультуралул ва спортрал министерствалул, мукунма Чачаннал Миннацрал кабакьулийну.
Экономикалул элмурдал кандидат, хIакин-стоматолог, 1-мур классрал ххассалбуву ва физкультуралул преподаватель цачIун бувну бия спортрал бакъассагу, Дагъусттаннахсса ччаврил ва яхIирал. Марафондалул мурад бия кIирагу республикалул халкьуннал дянивсса дусшиврул арарду цIакь даву, физкультура ва спорт машгьур даву.

Гьашину марафондалий гьуртту хьун бувкIминнаву ( Сердер Эмирчубанов, Ислам МахIаммадов, Рабадан БахIаммадов, Анвар-ХIажи Мирзоев, Мурад МахIаммадтIагьиров) мукьа инсан ия цалчин лечан нанисса. Спортсментурал ва ххуллу зувираксса ссятрал мутталий бивтунни. Му чIумул дянив вайннал бувагу шану къалавхъссар, так гьарица 10 километр риртукун, бацIаву дурссар щин ласун.

Дазуй Дагъусттаннал делегация лахъа-хъунну хьунабавкьунни Чачаннал спортсментурал. Гихунмайсса 70 километралийхсса ххуллу вайннал архIал бивтунни. Финишрайн бивсса чIумал Ислам МахIаммадовлул бахшиш бунни Чачаннал Республикалун Кьуран. Щала ххуллу бивтсса чIумал лечултравасса цаннал спортрал ссятрай 222 975 ша ккаккан бувну бур.
КIицI лаган, марафондалий гьуртту хьусса Дагъусттаннал ххюя спортсментурава ца лаккучу ур. Ва ур хIакин- стоматолог, ТтурчIиял шяравасса Мирзоев Анвар-ХIажи Зайнуллал арс.
Ультрамарафондалий гьуртту хьусса циняв спортсментуран дуллунни медальлу, сертификатру ва дакIний личIансса бахшишру.