МахIачкъалалив хьунни «Справедливая Россия – За Правду» Дагъусттаннал региондалийсса партиялул отделениялул даврил хIасиллу дуллалисса конференция. Ванил даву дачин дурну ия партиялул Бюрорал cоветрал каялувчи, ДР-лул Халкьуннал Мажлисрал председательнал хъиривчу Камил Давдиев.
Шикку гьуртту хьунни республикалийсса муниципал идарарттайсса (4520 партиялул члентал) 54 кIанттул отделениялул 57 делегат. Мукунма конференциялий гьуртту хьунни ДР-лул Халкьуннал Мажлисрал, шагьрурдал ва районнал мажлисирттал, жагьилтурал парламентрал депутатътал, ДР-лул Юстициялул министерствалул управлениялул ва Республикалул бувчIавурттал комиссиялул вакилтал.
Камил Давдиевлул бувсунни Дагъусттаннал региондалийсса Партиялул советрал дурсса даврил хIасиллая. КIицI лавгунни, хIакьинусса кьини «Справедливая Россия – За Правду» партиярттаву 2-мур ххуттай душивруцIун, депутатътурал сияхIгу ларайсса душиву. Му бакъассагу, Давдиевлул бувсунни «Патриотический социализм» тIисса цIанилусса партиялул цIусса давурттая.
– Партиялул хьхьичI бивхьусса агьамсса масъаларттава ца хъанахъиссар хасъсса аьралий операциялул гьурттучитуран ва миннал кулпатирттан кумаг баву. «Справедливая Россия – За Правду» партиялул депутатътал кумаг буллай буссар хасъсса аьралий операциялул гьурттучитуран.
Депутатътал чялишну гьуртту хъанай буссар «Собери ребенка в школу», «Помощь родной школе», «Елка желаний» ва цаймигу акциярттавух. Махъсса ппурттуву гьарза хъанай бур СВО-лий хушрай гьуртту хьун ччисса жагьилтал. Уттигъанну хушрай СВО-рай гьуртту хьун лавгунни жул партиялул член, Буйнакск шагьрулул Мажлисрал депутат Ислам Долгатов.
Шиккува кIицI лаган, цIанасса ппурттуву СВО-лий жула аьралитуращал архIал талай уссар «Справедливая Россия – За Правду» партиялул аппаратрал каялувчи Руслан Татаринов.
Хъирив ихтилатру бунни кIантту-кIанттурдайсса партиялул отделениярттал каялувчитурал.
«Молодежь Справедливой России» партиялул отделениялул бакIчинал видеослайдирттайхчIин ккаккан дунни жагьилтурал парламентрал дурсса давуртту.
Ва ххуллухьсса конференциялийгу, цIуницIакул чIурду буллуну, партиялул Бюрорал Советрал каялувчину увчIунни ДР-лул Халкьуннал Мажлисрал председательнал хъиривчу Камил Давдиев. Ва бакъассагу, региондалул отделениялул сияхIравун увчIунни 23 инсан.
Ахирданий Камил Давдиевлул «Справедливая Россия – За Правду» Партиялул советравун цIуну кьамул бувсса члентуран буллунни партиялул билетру. Барчаллагьрал чагъарду буллунни Советрал иширттавух чялишсса гьурттушинна дуллалиминнан.
Имара Саидова
