[dropcap]Н[/dropcap]оябрьданул 7-нний МахIачкъалалив хьунни Октябрь революция хьуну 100 шин шаврил хIакъиравусса батIаву. Дусшиврул къатравун му иширайн бавтIун бия министртурал кабинетрал вакилтал, республикалул парламентрал депутатътал, коммунист партиялул уртакьтал, студентътал ва цаймигу.

ХIасан Аьдилов
[dropcap]Б[/dropcap]автIминнал хьхьичI махъ лавхъунни АьФ-лул Коммунист партиялул Дагъусттанналмур бутIул 1-ма секретарь, Да­гъусттаннал Халкьуннал Мажлисрал вице-спикер МахIмуд МахIмудовлул. Ганал дакIнийн бувтунни, гьамин 2017 шинал октябрьданий дурну диркIшиву цIусса заманалул дайдихьу, ганил гьануми васиятру (заповеди) хьуну диркIшиву захIмат, халкьру кувннай кув бакьаву (солидарность), халкьуннал дусшиву, архIалшиву ва уссушиву. «Гьаман му таварихраяту дайдирхьуссар билаятрал тарихраву цIусса, цамур журалийсса чIапIи. Дунияллул карталий хIасул хьу­ссар цIусса билаят – СССР, микку власть кIунттихьхьун ларсун диркIссар захIматкашнал ва коллективчитурал. Мунил хIасиллал махIаттал дурну диркIссар щаллара дуниял – азарвахъул цIу-цIусса заводру, агьали чантI учин баву, космосравун буккаву ва агьали социал иширттал чулуха буруччаву», — увкунни М. МахIмудовлул.
Ганалва бувсъсса куццуй, Дагъусттаннайгу хьуссар мукуннасса дахханашивуртту.
Яла махъ лавхъунни ДР-лул ХIукуматрал Председательнал кIанайманал 1-ма хъиривчу Анатолий Карибовлул. «1917 шинал октябрьданий хьусса иширттал гьануцIакул баххана бувссар дунияллул тарихравусса ишру ва инсантурал кьадарду. Гьамин му таварихрая тIайла хьуну Да­гъусттаннай дирхьуссар автономия. Дагъусттан га чIумалнин бивкIссар билаятрай ца яла ма­хъун багьмур субъектну, экономика диркIссар заэвсса, культура диркIссар яларайсса даражалул, дахьва 9% агьалинал бивкIссар дурккусса. Совет властьрал чIумал хьусса дахханашивур­ттайну жулла республикалул социал-экономикалуву таман­сса лябукку хьуну бивкIссар», — увкунни А. Карибовлул.
БатIаврий ихтилатру бунни партиялул уртакьтурал. Яла ккаккан дунни концертгу.