Жува аьдат хьуну буру хьхьичIунсса аьлимтал, артистътал, спортсментал лахъа-хъун буллай, цаппара, къачансса агьамшиву дусса пишалул заллухъру тIурча, ххютулу ливчIсса кIанттурду хъанай бур. Ттул ихтилат каруннил магьиршиву аьркинсса токарьнал пишалияр. ЧIярусса шиннардий ва пишалий зий ларайсса ккаккияртту чIалачIи дурсса Шамсуттин АхIмадовлуяр.
КIира шинал хьхьичI (2024 ш.) «Лучший по профессии» тIисса пишалул усттаршиврул конкурсрай гьуртту хьуну, «Токарь(станочник)» номинациялуву ванал бувгьуссия цалчинсса кIану.
Увну ур Шамсуттин Ставрополлал крайрайсса Хорошевский тIисса шяраву Уллучаратусса Муслимлул ва Магьиратлул кулпатраву. Вайннал цала нитти-буттан кумагран шяравун гьан увну, кIий хъуна хьуну ур Шамсуттин. Школагу ванал Уллучарав къуртал бувну бур. ЧIивинийва итххявхсса, сивсусса оьрчI ивкIун ур. Мудан ххув шайсса ивкIун ур шяраву, райондалий дуллалисса личIи-личIисса конкурсирттай, спортрал бяст-ччаллаву. Школа къуртал бувну махъ, ва зана хьуну ур нитти-буттачIан, Ставрополлал крайрай Кочубейрал райондалийсса Хорошевский шяравун. Шикку буттащал токарьный цехравун занай, лавхьхьуну бур мах чарххирай дирхьусса личIи-личIисса давуртту дуллан. Буттал шаттирдайх лавгун, язи бувгьуну бур токарьнал пиша.
Шичча Невинномысск шагьрулийн увкIун, зун ивкIун ур «ЕвроХим» компаниялул ООО «НевРСС» предприятиялий. Цала даву ларайсса даражалий дуллай тIий ва цимилагу лайкь хьуну ур Барчаллагьрал чагъардан ва цаймигу наградарттан. Цехраву баян бувсса конкурсирттай цимилгу хьхьичIунсса кIанттурду бувгьуну бур. Шамсуттин ккаллину ур ца яла хьхьичIунма токарьнан. Мунияту каялувчитурал маслихIат бувну бур ванан пишалул усттаршиврул конкурсрай гьуртту хьун. Конкурсрал циняв этапирттай Шамсуттин чIаланну хьхьичI ивкIун ур. Цала номинациялуву бувгьуну бур цалчинсса кIану. АхIмадовхъайн токарьтурал династия учин бучIиссар. Шамсуттиннал арсналгу вава ххуллу язи бувгьуну, токарьнал пиша лавхьхьуну бур.
Июнь зурул 5-нний Шамсуттиннул оьрмулул 50 шин бартлаглай дур. ДакIнийхтуну юбилейгу барча тIий, чIа тIий буру цIуллушиву, дуллалимуниву тIайлабацIу.
Андриана Аьбдуллаева
