Инт дайдихьулул чIумал, апрель зурул 1-нний 1946 шинал Хъусращиял шяраву, лакрал цIанихсса аьлимчунал ва шаэрнал Абачарал къушлий, чIаку мурадрал ххуллий, бувну бур хIакьину жунма цинявннан ххуйну кIулсса, илданий цIа бусравсса, гьарцагу даймуниву, дитаймуниву итххявхсса исвагьисса душ — Аьрасатнал Федерациялул культуралул лайкь хьусса зузала, «Илчи» кказит дунияллийн буклай байбивхьуния шинмай 25 шинал мутталий жард къакуну мунил редакторшиву дурсса инсан, гьунар бусса публицист, театровед, жяматийсса ишруккакку ХIусайнаева Качар.

Аьзизсса Качар Абачараевна! Жулва редакциялул зузалтрал цIанияту, цинявппагу «Илчи» буккултрал цIанияту, щалагу лакрал агьалинал цIанияту барча тIий буру вихь дунияллийн бувксса кьини. ЧIатIий буру вин чIярусса, цIуллусса шинну, даркьусса кьинирду, нахIусса ссятру! Вила оьрмулул ххуллий ина ттинин бартбивхьусса цайми-цайми ххаллилсса мурадру бувагу хIисав къабарчагума, 1991 шинал къатIитIавай тIивтIуну бивкIсса лакку кказит ччаннай бацIан бан, бавцIуну мукьахгу му жулва миллатрал хъусну, хъун ккурчIану хьун буван ина бивхьусса захIмат ххинугу чIявуссар, вил цIа мудангу виричушиврул ххуллу-ххуттай чирчуну дитаншиврул, кьадрулий кьамул дулланшиврул ва кьиматрай зумух ласланшиврул.