ДакIнин бутанну, UFC-лул тарихраву Ислам МахIачевлуйн бияннийн Аьрасатнал боецтурал кIира категориялий чемпионнал титуллу цIакь дурсса иш къабивкIшиву. 2025 шинал ноябрь зуруй Австралиянал боец Джек Дела Маддаленащал ивну, Ислам кIилчингу (полусредний вес) UFC-лул чемпион хьушиву. Уттигу Ирландиянал гужсса ию Иен Геррищал данди увккун, Аьрасатнал билаят Исламлул уттигу ца шачIанттуйн бюхттулну гьаз бувшиву.

Вай гьантрай дунияллул СМИ-лул, социал сетирдал унгу-унгуну гьаз дурсса темагу дур Исламлул ххувшаврицIун дархIусса.
Дунияллул гъунттулу лакрал миллатгу цIакьну бушиву исват бувсса ва багьадурая багьавайру жува пахругу буллалисса. Ттунна Исламлуву личIинура ххуй дизайшиву лакку мазрайгу гъалгъа бувайсса, Лакку кIанугу ххирасса жагьил ушиву. Гьаннайсса, мархрая, гьанурдая арх къаувцсса, цува цуксса лахъсса даражалийн гьаз хьурчангу, хьхьичIун урувгсса, ас-ламус бу­сса ушивугу.
Ислам МахIачевлул хIакъираву машгьурсса инсантурал кумур.

Даниэль Кормье, аналитик ва комментатор, американец, портал ActuMMA:
– Андерсон Силвал цала мухIлу дуручлай 16 ххувшаву ласайхту, мунан дакIнийнмагу къабагьхьунссия цала рекорд лув личIан дансса, ялтту уккансса чув укканссар тIий. Дунни му даву Исламлул.
Тарихравун куртI хьурча, шикку спортрал циняр журарду хIисавравун ласурчагума, Исламлул ххувшаву спортрал дунияллий ца яла бюхттулмур лахъазанни. Жува, цинявппа заманардал ца яла бюхттулма боецнал, учиннуча, уттининсса UFC-лул тарихрал яла хьхьичIунманал хIурмат буван аьркинссар багьавай.

Анатолий Малыхин, ММА-лул шанна категориялул цалчинсса чемпион тарихраву, «Чемпионат» портал:
– Шикку ци учинссар? Ислам ур уттавасса бусала. Цала оьрмулул ххуллийну ва кьадарданийну ванал ккаккан бунни, инсан цала мурад бартбигьин цукунсса кьасттирай хьхьичIунай ачайссарив. Ва цукун лайкьну уккайссарив хьхьичIун, цукун усттарну ва бюхъу буну даву дувайссарив.

Дана Уайт, UFC-лул президент, russian.rt.com:
– Агана вава куццуй Ислам МахIачев гихунайгу хъит тIурча, ванал рекордраяр ххув хьун щищачIав къахьунтIиссар. На сагъну уссаксса, гьамин, ттулва оьрмулуву мукунсса иш хьун ххай акъара.

Умар Кремлёв, Дунияллул халкьуннал дянивсса боксрал ассоциациялул президент, IBA-лул пресс-служба:
– Исламлул, циняр рекордирттаяр хьхьичIун увккун, тарихраву личIансса хIасиллу чIалачIи дунни. Вана вари Аьра­сат! Дунияллий хьхьичIунми спортсментал, гьунар бусса, гуж бусса, хIакьсса чемпионтал Аьра­сатнавур хъуни хъанахъисса!

ХIабиб НурмахIаммадов, UFC –лул чемпион:
– Бур «хьхьичIуннайшинна» тIисса махъ, инсан цала мурадрайн ияншиврул хьхьичIунай ачайссар тIисса мяъна-мурад­райсса. Спортраву ва мукъул мяъна агьамссар. Ислам ва «хьхьичIуннайшинна» синонимрур.
Спортрал ва журалуву Исламлул ларсунни циняр лахъазанну, хьхьичIуннайшивуртту ва UFC-лул тарихрал рекордсмен хьунни.
Ислам октагондалувун увхсса атлетътураву яла хьхьичIунмари, махъ бакъа.
ПатIимат Рамазанова