[dropcap]И[/dropcap]табакьлакьисса словарь­данул, бюхъайссаксса биялну, ттизаманнул лакку мазрал мукъурттил луртан, ци­нявнначIа аьмну ишла хъанахъисса лексика, халкьуннал гъалгъалуву ва чичрулул мазраву мяйжанну ишласса махъру лавсун буссар.

---

[dropcap]Л[/dropcap]уттираву сайки 30 азарунничIан бив­сса чIявучил ишла буллалисса махъру, личIи-личIисса цачIун був ва бавхIу махъру, идиомартту ва фразеологизмарду дуссар. Вай мукъурттил лак­рал хал­кьуннал оьрмулул ва багьу-бизулул агьамми чулухалурду ва минначIа машгьурсса касму-пишарду ва миннул терминология чIалачIи дуллали­ссар.

Словарьдануву яла ишлами жямат-политикалул, эконо­микалул ва элму-техникалул тер­минну ккаккан дурну ду­ссар. Словарьданувун лакрал хал­­кьуннал лавгмуния, багьу-бизулия, аьдатирттая ва м.ц. бусласисса тарихийсса ва этног­рафиялуцIун дархIусса терминология ларсун дуссар. Биялну буллуну буссар цайми мазурдива – аьраб, парс, турк ва оьрус мазурдива – бувхсса лексика. Шивува теориялуцIун бавхIусса цаппара масъаларттугу ца чулухун бувтун буссар, учиннуча: словарьданул статьяртту дузал баврил принципру, миннувун мисал-калимартту ласаву, цачIун був махъру ва бавзу махъру личIи баву ва ми словарьдануву булаву.

Словарьдануву хасъсса иша­рар­ттайну (диал.,ист., уст., книжн., груб. ва м.ц.) личIи-личIисса мукъурттил группар­ттал батIулшиву (цанния ца личIишиву) ккаккан дурну ду­ссар. Бюхъай, диал. ва уст. тIисса ишарартту чан дан багьлай бикIангу, цанчирчан тамансса мукунсса махъру ттизаманнул чичрулулмур мазралмину ишла хъанай бур.

Cловарьданунсса мукъур­ттил сияхI дуллалийни, литературалул маз, хаснува мунилмур мукъурттил лагру (луртан) ттигу диялну ца низамрайн дурцуну дузал хьуну дакъашиву хIисавравун ласун багьлай бия. Лугъатиртталминнул ва нормативралминнул, аьмсса гъалгъалулминнул ва литературалул мазрал мукъурттил дянив кьянкьасса дазу рищаву щаллу хьуну дакъар, мунияту словарьдануву лугъатирттал му­къурттил вариантру ва чIявучил аьм­сса гъалгъалул махъру буссар.

Лугъатиртталми махъру язи бугьаврил ва ми словарьданувун ласаврил масъала ца чулухун бутан захIмат хъанахъа­ву укунсса тагьардануцIунгу дархIуну дур. ЦIанасса лакку мазраву лугъатиртталми махъру цумирив ва чичрулул мазралми цумирив личIи бан къабигьану бур, цанчирчан тамансса автортал – личIи-личIисса лугъатирттал вакилтал – цала чичрурдавун мивасса махъру хъинну сивсуну хIала буллай бур, цIанакулсса чичрулул мазравугу мукунсса тапаватшивуртту ятсса ва личIину къулагъас дуллан аьркинсса гъалатIру кунма ккаклай бакъар. Мунихлуну тамансса укунсса журалул махъру чичрулул мазраву хьунабакьлай бур ва халкьуннал аьмсса мазраву ми аьдатрай кунма ишла хъанай бур.

Лугъатирттал махъру словарьданувун ласаврийну лакрал литературалул маз авадан ва хьхьичIунмай хъанахъишиву хIисавравун ласаврищал, миннул къапкъаз мазурдил ах­ттарчитуран къулагъас дансса материал дулайшивугу кIулну бикIан багьлай бур.

Мукъурттил цаппара тематикалул группарду словарьда­нувун ласаврилгу захIмат­ши­вуртту хьун дуллай дия. ХьхьичI ирглий ва масъала этнонимирттацIун (миллатир­ттал цIардацIун) ва миннул агьаммми формардацIун (жям ккаккан дуллалисса махъру ва адиминал ва хъаннил жинси­рал махъру) дархIуну дия.

Лакку мазраву уттигу миллатирттал цIарду ца кьаралданий сакин даврил кьяйдарду цалий дар­цIуну дакъар ва му ишираву тапаватшивуртту хьунадакьлай дур, учиннуча: оьрус «русс­кие; русский»; оьрус адимина «русс­кий (мужчина)», оьрус щар­сса «русская (женщина)»; амма: лак «лакцы», лаккучу «лакец», лаккущар «лачка»; дарги «даргинцы», даргиричу «даргинец», даргирищар «даргинка»; дагъусттанличу (дагъусттанлув, дагъусттанчу «дагестанец»). Укунсса тапаватшивур­ттащалсса формарду литературалул мазраву хьунадакьай ва мунийн бувну ми словарьданувугу ккаккан дурну дуссар.

ЦIана ишла хъанахъисса орфографиялул нукьсанши­вур­тту сававну, словарьданувун бакI­махъру хIисаврай чIявуну къалавсунма личIай личIи бувну чичлачисса, амма ца мяъналущалсса номинативсса (цIа бусласисса, баян буллалисса) бав­зу махъру.

Ва ишираву мукъул словарь­данувусса кIан­тту язи бугьавриву орфографиялулми шартIру ялтту дуклай дур: луттиравун ласай, ца кьяйдалий кунма, лавчIун ягу дефисращал чивчусса, мяъна цану дузал бувсса махъру (лексикийсса цацинну), амма мяъна цашиврул чулуха вава куццуйсса, цивппа ишир­ттал ва м.ц. цIардуну хъанахъисса ишласса бавхIу махъру кюрттаву мисал-калимарттуну булай ва мунин бувнугу словарьдануву­сса бакIмукъурттил сияхI ссуссукьу шай.

Цалчинмур компонент (бу­тIа) кутIа прилагательний­ну, цIанил падежрайсса ягу гъан­шив­рул падежрал кутIа дур форману бусса существительнирдая определениярттащалсса композитру сакин шайссар. ЦачIун був махъ лавчIун чичайссар ва словарьданул цацинну (махъну) ккалли байссар: цIубарз «новолуние», бакIкьюкьа «авангард», буттауссу «дядя (по отцу)» ва м.ц..

Амма жапашиву шай миллатирттал ва географиялул цIардащалсса му журалул махъру чичайни: масккав гьивч «антоновка», къалмухъ чяй «калмыцкий чай, оьрус хъан «сургуч» ва м.ц. КIива компонентрая бувсса ца мяъна ккаккан дуллалисса цIакьсса бавзу махъру, миннул лях цамур махъ бутан хъанай бунугу (къуч учин , къуч циван учав?) цайнува цивппа­сса мукъурттил эквивалентруну ккалли хъанахъиссар. ЛичIину чичайхьурчангу, словарьдануву ми цалчинмур мукъул алфавитрал низамрай цIусса ххуттая байбивхьуну, личIину словарьданул статья кунма булайссар. БавхIусса цачIун був махъру кIилва буллуну хьунабакьингу бюхъайссар – кюрттаву бавхIу махъру кунма, бакIмахъруну – бавзу махъру кунма.

БувчIин бай махъруну, оп­ре­­делениярттуну (хъарсса при­лага­тельнирдуну) аьркин бай­сса цаппара существитель­нир­дал гъаншиврул падежрал формарду словарьдануву бакI­махъру хIисаврай ягу кюрттаву ккаккан даврил масъалагу ца чулухун бутан багьлагьисса масъала бия. Укуннасса тагьар «цIарду-наречияртту» ккаккан баврилмур масъалагу бия: ми кIанттул падежирттал формардуну ягу батIул хьусса (цIусса мукъурттийн кIура бавсса) бакIмахъруну ккалли бан багьлай бия.

ЗахIматшиву хIасул хъанай дия бавзу махъ (мяъналул ва сакин­шиннарал чулуха батIул къахъанахъисса синтаксийсса цацин (единица) ва цалийнусса мяъналущалсса атрибутив­сса комплекс личIи байни, яъни цачIун був мукъурттил номинативсса цацин ва синтаксийсса цацин кунния ку личIи дайни.

Махъру бавзуну хьусса цIардая (лексикийсса цацинная) бавхIу махъру (синтаксийсса цацинну) личIи баншиврул укунсса мисал буцин бюхъанссар: муххал ххуллу «железная дорога» (цалийнусса мяъна, предложениялул члентрава ца) ва муххал ламу «железный мост» (бавхIусса махъру; ламу «мост» бикIан бюхъай тIаннулгу «деревянный»: тIаннул ламу «деревянный мост»).

Махъру бавхIуну бувсса тик­рал хъанахъисса цалчинмур ягу кIилчинмур бутIущалсса, цасса мяъналущалсса номинативсса цацинну словарьданувун ласайни, ми ххуттал хIарпирдай «хъирив статья» кунма словарьданул статьялуву буллуну бу­ссар, лу аьркин буллалиманан мунийну кумаг хъанахъиссар.

Словарьдануву, му бакъассагу, цачIун бувну бавхIусса мукъур­ттиву балжийсса мяънардащал I-чинмур ягу 2-чинмур компонетну цаппара лексикий­сса цацинну ишла даву ва лакку махъру хIасул байни ми гьуртту шаву дурчIин дурну дуссар.

Определениярттащалсса ком­позитру лавчIун чичаврил кьяйда цIакь шаврийну цачIун був мукъурттил ва бавхIу мукъурттил дянив дазу рищаврил, лакку мазраву махъ личIи баврил масъала щаллу бан кумаг бантIиссар: кунния ку личIи буллалиссар цалийну хIасул хьусса (лавчIун ягу дефисращал чичай­сса) махъру ва бавхIусса номинатив цашияртту.

Миннул дазу лексикографиялувугу рирщуну, ми цивппа-цивппасса махъру бушиврий бацIан бан аьркин­ссар. Амма миннул дянив дазу рищун мудан хъанай ба­къар, мунин бувну мукунсса махъру кIива журалий буллуну буссар – кюрттаву ягу бакIмахъруну. Цалий къадарцIусса орфогра­фия сававну словарьдануву бавхIусса цачIун був махъру ли­чIи-личIисса журалий чивчунугу хьунабакьинтIиссар (ахттайн чак, ахттайн-чак, ахттайнчак «обеденный намаз»).

ХьхьичI бихьлахьисса словарьдануву мивун махъру ва калимартту ласайни ва мукунна личIи-личIисса формарду хIасул дайни норматившиврул кьяйда дурурччуну дуссар, яъни лакрал литературалул мазрал лексикалул хIакъиравусса норматив­сса справочник хъанахъиссар ва личIи-личIисса тематикийсса группардавун багьлагьисса словарьданул мукъурттин хасъсса аьламатирттая аьркинсса ишарарду дуллуну ду­ссар.

Норматившиву словарьдануву цайми кIанттурдайгу дурур­ччуну дуссар, учиннуча, орфографиялул ва мунил кьяйдардал нукьсаншивурттайн бувну чичрулуву ккаккан къадай­сса фонетикийсса хасъсса аьламатру (аьчух чIурдал лахъишиву, бавщу чIурдал лабиализация (мурччалшиву), аьчух чIурдал фарингалшиву (кьакьарттулшиву) словарьдануву тIайлану кка­ккан даншиврул миннун­сса чараннал кьяйдарду аьркин дурну дуссар.

Ва ми аьламатругу щалвавагу словарьдануву ишла дурну дуссар: кьакьарттулми аьчух чIурдан диграфру (кIилийнусса хIарпру) иь, яь аьркин дурну дуссар, масала, элму [иьлму] «наука», ятIул [яьтIул] «красный»; чIунил лахъишиврун – чIурчIаврал лишан, масала, та` «тот», ма`хъ «потом»; мурччалшиврун – в (хIарпирал хъирив), масала. ка [ква] «рука».
Словарь чIявучин цIа куну, чIявучил мюнпатранну ишла буллансса лу хIисаврай итабакьлакьиссар: школарттай ва вузирдаву дарс дихьлахьиминнан, таржумачитуран, радиолул, телевидениялул ва печатьрал зузалт­ран, лакку маз, да­гъусттаннал ва къапкъазуллал мазру элмийну ахттар буллалиминнан. Хаснува цала миллатрал бикIлилмур ватандалия лавгун, кьатIух миналул хьусса, ниттил маз лахьхьин ччисса лакран агьамсса кабакьулул луну лякъинтIиссар.

Словарьданул ялунссаннун дуллуну дуссар: 1) Географиялул цIарду; 2) Лакрал шяраваллал цIарду ва миннул агьамми формарду; 3) Дагъусттаннал шяраваллал цIарду; 4) Лакку мазрал грамматикалул кутIасса очерк.

Словарьдануха зузиссаксса хIаллай ва му бищун хIадур буллалисса чIумал ттун мудасилну РАН-далул Дагъусттаннал элмийсса центрданучIасса Маз­­рал, литературалул ва магьир­лугърал институтрал Лекси­ко­логиялул ва лексикографиялул отделданул зузалтрал чулуха чIа­рав бацIаву ва кабакьаву дуллай бия.

Миннащал жу цимилагу словарьданул сакиншиндарал, личIи-личIисса журалул махъру словарьданувун ласаврил ва дагъусттаннал лексикографиялул аьмсса ва хасъсса масъалартту ххал бигьай­ссия. Укун даву щаллу дуллалаврил ва маслихIат ккаккаврил словарь дузал баврин ва словарьданул статьярттан яла къулайми вариантру язи дугьаврин хъинну кумаг хьуна.

Словарьданул ва лакку мазрал масъаларттал хIакъираву проф. Аь. Аь. Аьбдуллаевлущал ккавксса маслихIатру жу дуллали­сса даврин хъинну мюнпатран­сса бия. Элмийсса редакторнал Р.ХI. Эльдаровал словарь буллалийни, компьютерданувун ласласийни ва грамматикалул очерк чичлачийни бувсса хъунмасса кумаг хасну кIицI бан буржлувну чIалай буру. Словарьданунсса махъру батIлатIийни, лакку му­къурттил мяънарду дурчIин дуллалийни лакку маз ххаллилну кIулсса Дагъусттаннал халкьуннал ша­эр Ю.Р. Ххаппалаевлул, шаэр ва аьлимчу А.ХI. ХIусай­наев­лул ва ДГПУ-рал доцент Аь.Аь. ХIайдаевлул хъунма­сса кумаг бувссар. Бархъаллал лугъатрал материал аьпалувух ивхьусса ДГПУ-рал доц. М.И. Кьаландаровлул дуллуссар.

КIицI къадан къахьунссар республикалул лакку кказитрал «Илчилул» жу дуллалисса даврил чулухуннайсса мудасилсса хъуннасса къулагъас ва кабакьаву. Мунил ва даврияту кказит буккайминнахь мудан бусайва ва буккулт ванищал кIул баншиврул словарьданул цаппара бутIри кказитрай бивщуна.
Жямат чIярусса шиннардий ялугьлагьисса укунсса словарь сакин буллалисса къабигьа­сса давриву ттуцIунма кабавкьуцириннахь дакIнихтунусса куртIсса барчаллагь тIий ура.

Словарьдануву, щак бакъа, диялдакъашивуртту, гъалатIру бикIан бюхъайссар, мунихлуну мукунсса нукьсаншивуртту ккаккан дурну, ми кIанттурду бакьин бансса маслихIатру словарь бувманал барчаллагьращал кьамул бантIиссар.
Словарьданул хIакъи­раву­сса зулва пикри, ялун лирчу­сса диялдакъашивуртту кка­ккан дуллалисса ва словарь ххуй бансса маслихIатру тава­къюъри ва адресрай тIайла буккаву: 3677032, Махачкала, ул. М.Гаджиева, 45, Институт языка, литературы и искусства им. Г.Цадасы ДНЦ РАН.