Лахъа-хъунну кIицI ларгунни жулла республикалул хъуншагьрулий майрал 1-мур кьини – Интнил ва захIматрал байран. Республикалул цайнува цивппа хьусса ва пишакарсса артистътурал шагьрулул личIи-личIисса махIлардай, личIи-личIисса майданнай ккаккан дуллай бия концертру.

Бадрижамал Аьлиева
М. Горькийл цIанийсса Оьруснал театрданул хьхьичIсса майданнив хьуна жулва цIа дурксса балайчиталгу гьурттусса концерт. Аьбдул Мурадовлул, Роза Макьсумовал, Даниэль Гьаруновлул, мукунма Дагъусттаннал опералул ва балетрал театрданул артистътал Эльвира Маммадаевал, Белек Абасовлул, Денис Федоренкол ва цайминнал цалва язими балайрду щаллу бувна ва кьини шиккун бавтIсса тамашачитуран цIа куну. Шиккумур сахIналийн мукунма бувккуна Дагъусттаннал пачччахIлугърал филармониялул артистътал, Росгвардиялул Ухссавнил Ккавкказуллал округрал 102-мур бригадалул Аьралий оркестр, Республикалул Халкьуннал творчествалул къатлучIасса халкьуннал балайлул «Волна» ансамбль ва шагьрулул П.И. Чайковскийл цIанийсса ОьрчIал искусствардал 1-мур школалул чIава артистътал.

ЧIаравва Дагъусттаннал ссихьрал театрданул артистътал бия цалва чIава тамашачитуранмур дялахъру дуллай.
Лениннул комсомолданул паркраву концерт ккаккан дуллай бия Дагъусттаннал паччахIлугърал филармониялулми артистътал ва шоу-балет «Адемос».
Хьхьирил зуманив, Родопский бульварданий тIурчан, Дагъусттаннал филармониялул «Уличный музыкант» проектрал лагрулийсса концерт дия – шикку личIи-личIисса музыкалул инструментру бишлай бия Дагъусттаннал халкьуннал инструментирттал оркестрданул артистътал. Ванийну хьунни «Уличный музыкант» проектрал сезон тIитIавугу.
Байрандалул концертру мукунна хьунни шагьрулул хъун майданнивгу, Къумукьнал театрданул хьхьичIгу – шиккумур шадлугърай гьуртту хъанай бия Лакрал театрданул артистъталгу.